KUCHING: Naka pukul 8.00 pagi kemari, enam buah sekula di Sarawak agi ditutup ketegal ampuh bah.
Sekula ke agi tutup naka pukul 8.00 pagi kemari, ke diterima ari ‘Unit Perhubungan Awam’ Opis Pelajar Menua (JPNS), iya nya SK Tagageng (Subis, Miri), SK Kpg Klid (Dalat), SK Nanga Nyuruk (Kanowit), SK Nanga Bon (Sibu), SK Ulu Sg Sengan (Sibu) enggau SK Sg Salim (Sibu).
Menteri Pengelantang Pendiau, Indu enggau Pemansang Diri Sebilik, Datuk Fatimah Abdullah madah sekula-sekula tu semina deka dibuka enti ai ngelingi sekula nya amat-amat udah surut.
“Ambika chunto, SK Kpg Klid (Dalat), taja pan ai enda masuk ke dalam kelas, tauka enda ngampuhka rumah sekula nya tang ngelingi sekula nya agi ampuh sereta deras, enda likun ke nembiak tauka apai indai ke nganjung anak sida iya nurun sekula, laban mayuh endur di sitak nya, jalai sida nembiak nurun sekula agi nengah sungai.
“Enti ai deras, apai indai ke nganjung anak nurun sekula pan enda likun, alai udah nya sekula deka madah ngagai direktor JPNS pasal pekara nya, ke bedau ngasuh sekula nya dibuka,” ku Fatimah.
Iya madah baka nya lebuh dikerandau sepengudah bejadika Pengawa Pemandang ‘Evolusi Seni Jahitan Kreatif enggau Business Matching’ ti diatur Mosiwell Sdn Bhd di Plaza Merdeka ditu, kemari.
Iya madah bisi sekeda sitak, sigi ai masuk ke dalam kelas taja pan ai udah surut, tang ai pasang baru, kelas nya enda ulih dikena. Tang taja pia, bisi alternatif bukai digaga ulih sekula nya ngena endur bukai ke tinggi agi.
“Sekula bukai ke ditutup ketegal nadai jalai bukai agi deka nganjung anak nurun sekula tauka semua sitak nya kena ampuh bah,” ku iya.
Ba sekula ke ditutup ketegal kena ampuh bah, Fatimah madah maya hari udah manah agi, kelas tauka sekula ke ditutup nya patut nganti hari sekula nya.
“Atur ke digaga opis menteri pelajar (KPM), penyampau hari sekula nya ditutup patut diganti.” ku iya.
Fatimah mega madah, naka ke diatu, nadai sebarang ripot bisi diterima, kantin sekula nikika rega pemakai, ngambi ulih ari tasah ampuh bah ke nuntung sekeda sitak di menua tu.
Iya madah, KPM seruran beratika pekara tu, lalu naka ke diatu di Sarawak nadai sebarang ripot bisi diterima bekaul enggau pekara nya.
“Tiap orang ke bejalaika kantin sekula, sida iya bisi danji lebuh sida iya diberi kunterik nya, ke patut disain sida iya.
“Surat danji nya nyengkaum kos kuih tauka utai pakai ke dijual di kantin, nyengkaum berapa gram pemakai nya. Lalu kunterik ke diberi ngagai orang tu lebih ari setaun,” ku iya ke madahka atur bejalaika kantin enda tau enda nitihka atur KPM.
Iya nambah, enti deka nikika rega pan, iya ukai tau digaga sebarang tauka peneka ati, tang mesti betanya ngagai KPM dulu.