KUCHING: Promosyen ‘Visit My Kampung’ (VMK) ke ditengkebang Perintah Menua beserimbai enggau Taun Nemuai Ke Sarawak (Visit Sarawak Year-VSY) enggau Taun Nemuai Ke Malaysia (VMY) 2014 diatur kena nyungkak sereta ngemanahka program dagang temuai ba sesebengkah genturung pendiau tauka rumah panjai bansa Dayak di menua tu, seraya ngelakuka rumah panjai tauka genturung pendiau sida dikerindu ba program nyemilik tauka ‘homestay’.
Apin lama ke udah, lebuh bejadika VSY 2014, Menteri Muda Dagang Temuai, Datuk Talib Zulpilip madah, ke diatu bisi tiga belas buah rumah panjai udah dipilih bisi Pakej Homestay ke digaga nengah Strategi Tasik Biru Nasional (NBOS) ke meransang raban Dayak ngaga rumah panjai sida iya nyadi palan ulih narit temuai ngagai menua sida kelimpah ari meri penguntung ngagai mensia mayuh ke diau di rumah panjai nya.
Talib ba atur pengawa nya mega madah, ungkup sereta pengawa latih deka diberi ngagai rumah panjai tauka genturung pendiau ke kena pilih dipasuk dalam lis nya.
Entara tiga belas rumah panjai ke udah kena pilih ngangkatka ‘home stay’ sida iya dibagi ngagai rumah panjai Iban, Bidayuh enggau Orang Ulu.
Seiku orang dagang bansa Bidayuh, ke udah mujur ngaga ‘home stay’ Borneo Benuk Homestay, Councillor Isabell Julau madah, pengawa perintah ngangkatka ‘homestay’ di menua tu, sebengkah pengawa ke disukung sereta diperansang, kelebih agi ba bansa Dayak.
“Ba taun baru tu, kami mujur teulihka pengawa dagang temuai ke keterubah iya, ke taun 2014, iya nya ngelaluka penatai urung 400-500 raban Kelab Antarabansa Sorotines ke deka baum ba Palan Konvensyen Borneo Kuching (BCCK). Aku empu deka nguluka komiti tu baum kena 8 Januari tu ila,.” ku Isabell gaga madah ngagai Utusan Borneo, maya dikerandau kemari.
Penatai penyerta antarabansa tu ila, ku Isabell, deka disediaka pemakai tradisional Bidayuh, baka ke selalu digaga Isabell enti bisi temuai bemalam ba Borneo Benuk Homestay nya.
“Pengawa dagang ‘Home stay’ tu manah digaga, laban kitai mantaika chara adat kitai ngagai mensia mayuh ke enda kala nemu adat bansa tu.
“Baka adat Bidayuh, chara kami mantaika pemakai Bidayuh maya bebela pemakai, lalu diperindang ngena ajat Bidayuh. Siang hari, bala temuai deka dibai bejalai dalam kampung lalu bisi mega sekeda dibai mandi ba ai terejun enda jauh ari tu, kelimpah ari bemain asal adat Bidayuh,” ku Isabell lalu nambah, baka taun 2013, mayuh temuai ke datai diau ba ‘home stay’ sida iya, bala nembiak sekula, universiti sereta orang ari menua tu empu.
Taja pia, beratika taun tu taun ke manah, ku iya, laban penyerta konferens antarabansa mayuh udah ngaga buking ba sida.
Di ‘Borneo Benuk Homestay’ entara palan ke tau dilawa temuai maya sida iya bemalam dia, iya nya ai terejun, muzium mini ke mayuh mandangka adat Bidayuh nyengkaum sejarah kampung nya ke bisi bekaul enggau soldadu British sereta Gurkha, bejalai meda kebun lada, sereta bejalai dalam kampung nengah jematan buluh.
“Kadang-kadang kami mega bisi ngaga pengawa nanam pun kayu ke temuai ke bisi datai ari jauh, ngambika bisi ka pengingat sida,” ku iya.
Enti bala temuai deka meda rumah panjai ke asal agik, sereta jauh ari nengeri, Nanga Ngemah, Lemanak (kena pegai pelilih menua Sri Aman di Engkilili) ke diuan lebih 30 pintu, tau nguji diau ba rumah panjai nya.
Isa Lee, seiku orang ke bepengelandik dalam industri musik Iban, datai ari sitak menua nya empu lalu seiku orang ke endang bisi ‘home stay’.
Ku Isa, ‘home stay’ Iban di menua ulu, peneleba iya lain agi ari baka di nengeri, laban beratika rumah panjai sida iya sebuah rumah panjai ke unik, rumah lama.
“Temuai ke datai sigi diau di rumah panjai nya empu, begulai enggau kami sereta ngereja pengawa enggau kami. Enti tinduk di ruai pan, ngantung kibung ke diri empu,” ku Isa.
Kelimpah ari nya, aktiviti bukai ke ulih dikereja temuai di Nanga Ngemah Ili, iya nya mandi di ai kerangan, bejalai dalam kampung, ngelimpah ari meda bansa Iban kilah menua ulu nya.
“Enti temuai minta piring, maya niki ke rumah kami, pan ulih diatur, tang madah tumu, ngambika kami ulih nyendiaka regka,” ku iya.
Isa nambah, pemisi ke diulih ari pengawa dagang temuai tu deka diberi ngagai pan rumah panjai nya empu, ke dipelaba datai ke diatu, pemisi ke diulih ari nya, manggai bepuluh ribu.
Isa nandu, rumah panjai sida iya entara rumah panjai di Lemanak ke seruran alai temuai ari menua luar nemuai laban rumah panjai nya entara ke bisi dalam lis dagang temuai menua ke ulih digaga sida iya promosyen.
“Tiap aktiviti ke digaga bisi bayar iya empu taja pan enda mayuh ke sepala. Baka enti temuai deka enggau kami nyumai, semina mayar RM8 sepala, Nyumpit RM6 sepala, lalu enti ngena perau ngagai menua kami semina mayar RM150 mayar orang nyaga luan sereta ke nyadi tukang deriba perau nya,” ku Isa.
Talib ba jaku iya mega madahka, pemanah sereta unik rumah panjai kala digaga video dalam bulan Oktober taun 2013 ulih sebuah program TV antarabansa, ‘Lonely Planet’ ke ngemasukka rumah panjai dalam 10 lis nama pengabis atas ke dipadah sida iya ‘Where to feel like one of the family’ dalam program ‘Best in Travel 2014’.
Chairman ‘Home Stay’ menua tu, Jamilah Shukri madah pemisi industri ‘Home Stay’ di menua tu mantu industri pengawa dagang temuai di menua tu, kelebih agi lebuh maya bisi pengurang bilik hotel, kelimpah ari ngangkatka ekonomi menua tu.
“Industri tu mega diperatika sebengkah pengawa ngelala sekeda genturung pendiau ke ulih diberi kelala ngagai temuai ari menua luar, ngasaika peneleba diau begulai enggau komuniti di menua tu,” ku Jamilah.