SRI AMAN: Pengerami hari besai iya nya pelasar ti pemadu manah ungkup semua bansa ngintu mayuh macham budaya enggau adat, ku Kaban Parlimen Sri Aman Datuk Seri Doris Sophia Brodie.
“Tu mih penyelai Malaysia, semua rayat bisi peluang ngintu mayuh macham pengerami ti enda ngira penatai asal, bansa tauka jalai pengarap,” ku iya.
Doris madah munyi tu lebuh ti bejaku maya Majlis Ramah-Tamah Aidilfitri di Kampung Nanga Klassen begulai enggau kaban belayan sereta raban Urusetia Saudara Kita (USK) Nanga Klassen, Sri aman ditu bedau lama ti udah.
Ku iya, taja enda sama jalai pengarap enggau bansa, ngintu pengerami mayuh macham bansa di menua tu ukai nya nyadi penekul ngagai kitai laban kitai semua idup dalam siti perabung rayat Malaysia.
“Kitai di menua tu kebendar nya chukup betuah laban semua bansa meretika adat budaya pupu bansa lalu laban tu mih kaul penyerakup entara bansa kitai di menua tu chukup tegap,” ku iya.
Maya pengerami tu, iya muji pengeransing komiti USK laban ti mujur ngatur pengerami taun tu.
“Aku ngarapka USK deka terus ngatur pengerami tu lalu mayuh agi aktiviti ke bukai pengudah tu,” ku iya.
Sama datai maya pengerami tu iya nya Penghulu Andar Suntai enggau Penghulu Mingging Sigan.