Dikarang Rengenyan Labang
KUCHING: Aum antara semua opis menteri enggau ejensi perintah besai ti bekaul dikena ngenyampatka agi undang-undang pasal karbon digaga deka diatur pengudah Hari Raya Aidilfitri.
Sapit Menteri Besai, Datuk Seri Fadillah Yusof madahka, pengawa numbuhka undang-undang energi ulih dikena baru sereta pemadu beguna iya nya kredit karbon, dagang karbon tauka pengawa nyimpan karbon enggau lengkas mega sama disetujuka Menteri Besai Datuk Seri Anwar Ibrahim.
Fadillah ti mega Menteri Ubah Energi enggau Tranformasyen Ai madahka undang-undang bekaul enggau karbon ti deka ditumbuhka ba renggat perintah besai deka bepelasarka undang-undang nya ke endang udah ditumbuhka di nengeri tu.
“Sarawak udah besedia ari sukut undang-undang, atur enggau sistem ti udah dikemendarka dalam Kunsil Nengeri, tang ba renggat Malaysia (tauka perintah besai) apin sedia.
“Nya kebuah kami deka ngatur aum tu awakka kitai ulih nyeraris sereta nyadika undang-undang ti udah ditumbuhka di Sarawak nya nyadi asas kitai kena ngemansangka ba renggat Malaysia.
“Aum tu dipelaba diatur pengudah Hari Raya,” ku iya dirandau raban pengarang berita maya datai ngabang ba hari keterubah Nerima Pengabang Hari Raya Aidilfitri YAB Premier Sarawak ti diatur di BCCK ditu, sehari tu.
Kaban Parlimen Petra Jaya nya mega madahka perintah besai deka nempa kerejasama sereta ngiga chara ba renggat opis menteri bakani ngenyampatka pengawa numbuhka undang-undang bekaul enggau karbon di Malaysia.
Ngenang pekara ti sama, Abang Johari lebuh dirandau raban pengarang berita maya iya nerima pengabang ba hari keterubah Hari Raya Aidilfitri madahka, iya udah minta perintah besai ngeyampatka pengawa numbuhka undang-undang bekaul enggau dagang karbon.
Laban ku iya, nyadi sebuah nengeri Sarawak enda ulih ngereja nya kediri, tang ia patut nyadi polisi menua.
“Baka dipadah ngagai aku, (Sapit Premier Sarawak Datuk Amar) Douglas ti ngarika aku ba sebengkah aum, iya nya Menteri Besai deka numbuhka undang-undang ti deka bepelasarka undang-undang kitai.
“Sida udah ngajung orang sida mansik undang-undang kitai enggau ngemasukka undang-undang kitai nya ke dalam undang-undang perintah besai.
“Nya alai, reti ia ditu dagang karbon mesti ulih dipechaya, diaku sida raban bansa antarabansa, sereta undang-undang kitai bepelasarka pekara ti dipadahka Bank Dunia. Kitai nempa kerejasama rat enggau Bank Dunia,” ku iya.
Nampung pekara nya baru, iya madahka, Malaysia deka nyingkang ke mua, sida patut bisi parameter undang-undang ke ditumbuhka nengeri tu ti bekaul enggau dagang karbon enggau pengigin deka ngurangka ‘carbon emission’.
“Maya baum Majlis Tenaga Negara dua minggu ke udah enggau Menteri Besai, aku madah nya (undang-undang) patut digaga jampat ti nyadi pelasar kitai (Malaysia) nyadi pengemeran antarabansa dalam ubah iklim,” ku iya seraya madahka Sarawak di Asia Pasifik tauka Asean ti keterubah numbuhka undang-undang bekaul enggau dagang karbon.