BINTULU: Tiga iku bebadi nyawa nyengkaum dua menyanak lebuh sebuah bas sekula ngelantak belakang sebuah lori ti diengkah ba tisi jalai di KM12, Jalai Tebing Tasik Bintulu-Miri, pagi kemari.
Ketuai Opis Bomba enggau Penyah Penusah Bintulu Mohamad Meramit madah dalam penusah ti nyadi urung pukul 6.12 pagi, sida ti bebadi nyawa iya nya deriba bas, Ramnelan Samar enggau anak indu iya, Nur Nabila Syakila, 9 taun, sereta siku agi orang tambang bas nya, Aien Laila Aliesha, 11 taun, madamka seput di Sepital Bintulu.
“Enam iku nembiak sekula bakar, 14 iku ke bukai selamat lalu deriba lori ti ngemai besai nadai napi sebarang bakar,” ku iya, kemari.
Berebak enggau nya, Ketuai Opis Pansik Enggau Penerit Adat Trafik Sarawak Supt Alexson Naga Chabu madah, lebuh penusah nya nyadi, bas sekula nya dalam pejalai ari Samalaju ngagai pasar Bintulu lalu ngelantak belakang lori ti diengkah di tisi jalai.
Ku iya baru, asil pansik tumu tetemuka pun penusah dipelaba nyadi laban pengilap deriba lori nya ti ngengkah lori di tisi jalai ti nekul jalai.