Maya ngabas pejalai projek tu ba kandang Batu 15, Jalai Kuching-Serian kemari dia dipeda udah tembu urung 75 peratus
KUCHING: Sebagi ari projek Jalai Besai Pan Borneo ba kandang Batu 15, Jalai Kuching-Serian, udah nyapai 75 peratus tembu lalu dijangka tembu penuh bulan April 2018.
Taja pan ngelui ari timpuh ke patut, tang nadai meri empas ngagai penambah kos, tang ba timpuh ke bisi laun mimit.
Menteri Kereja Raya Dato Sri Fadillah Yusuf madah projek di Batu 15 tu, Kuching- Serian siti ari projek ke dikemata ulih Opis Kereja (KKR) nya empu.
“Projek tu siti ari Jalai Besai Pan Borneo, ti dikemujurka KKR nengah Opis Kereja Sarawak (JKR) nyadi ejensi ke ngaga projek nya.
“Ke Batu 15 Jalai Kuching- Serian, taja pan, iya disadang laun tembu, tang nadai meri empas ngagai penambah kos tang semina timpuh aja ke berubah ngagai bulan April 2018 tu ila, ketegal ngemutarka penanggul mindahka utiliti,” ku Fadillah madah lebuh dirandau maya ngabas projek nya ngenyit, laban deka meda kediri naka penembu iya.
Dalam penemuai ngenyit ngelawa sekeda projek Jalai Besai Pan di mengeri tu, Fadillah madah kebuah ngenyit datai ngagai palan projek nya laban deka meda kediri empu naka ni penembu iya.
“Ketegal penanggul ngaga projek, kitai napi enggau siti ari empas mindahka utiliti, lalu ketegal nya, penembu ngaga jalai nya bisi laun mimit.
“Taja pia, penanggul tu agi ukih diputar... Kami udah madah ngagai kuntriktor ngiga jalai bakani deka ngerumban projek tu tembu,” ku iya.
Iya mega madahka jematan dua lorong jalai udah tembu lalu diatu sida beratika pengawa ngaga dua lorong baru.
Iya ngelalau raban kuntriktor ke bejalika projek tu ba Jalai Kuching-Serian tu, patut beratika semua program pengatur trafik enda tau enda dititih enggau terit ngambika enda ngenusah penguna.
“Taja pia, aku lantang ati enggau pengawa ke digaga naka kediatu, ungkup Pakej Batu 15 Kuching-Serian tu,” ku iya.
Taja pia, iya madah bisi penanggul bah tunggal nyadi ba sekeda projek ke dipejalai kandang Jalai Kuching-Serian maya ujan bangat.
“Diatu Opis Entali Ai (DID) benung mutarka penanggul ai ke anyut ba sitak tu ngambika nadai agi penusah bah tunggal,” ku iya.