KUCHING: Malaysia keran ngulihka penguntung ekonomi ari industri ke bekaul enggau biomas.
Meretika peluang ba industri nya,Perintah Sarawak nengah kerejasama State Planning Unit (SPU) numbuhka Sarawak Biomass Industry Development Plan (SBIDP).
Menteri ba Opis Menteri Besai Dato Sri Nancy Shukri madah, pekara nya seraris enggau juluk National Biomass Strategy 2020 (NBS2020) lalu dikemujur nengah kerejasama Agensi Inovasi Malaysia (AIM).
“SBIDP deka nentuka perengka guna ke dikembuan ulih dikena ngintu biomas di nengeri tu ke alai atur tu dikearap ulih ngurangka sekeda belanja.
“Bioma s nyengkaum uras ari kampung ke udah diperimba,uras ari pengawa bekebun sereta uras ba kandang mengeri.
“SBIDP bela berunding numbuhka palan ngintu biomas baka ke di Bintulu enggau Miri,” ku iya.
Nancy mansutka jaku nya rambau ngulu Aum Antarabangsa Biomas Malaysia 2017(IBCM 2017) ke diatur di Palan Aum Borneo Kuching(BCCK) ditu,kemari.
Ngenang kaul ke sama, Nancy madah model enggau pelin pemansang industri nya ngujungka Pemansang Bio- Hub Sarawak ditumbuh lalu udah ngadu gempung enggau ejensi tauka kompeni luar.
Ku iya, gempung manah nya mulaika pemaik ekonomi ngagai ejensi sereta kompeni ke bekaul kelimpah ti nyendia peluang gawa.
“Pekara tu udah matak pengerindu komuniti antarabansa ke alai sida sedia ngadu gempung ngambi ulih nyaup ngangkatka industri biomas di nengeri tu,’ku iya.
NBS2020 ditumbuh ba taun 2011 lalu bejalaika pansik sentang chara Malaysia tau bulih penguntung ari industri bekebun sawit ke bekaul enggau biomas.
Pengawa dipun enggau biomas ari sawit lalu dikerembai ngagai biomas bukai baka ke ari kampung, komoditi bukai lalu diatu mungkur semua bengkah biomas.