KUCHING: Dua bengkah sampel ukui udah ditukuka positif virus Rabies pengudah diperesa ‘Direct Fluorescent Antibody Test’ (FAT) ke diterima ari Palan Pemansik Veterinari (VRI), Ipoh.
Nitihka penerang berita Sekretariat Komiti Mutarka Penusah Ngenyit Nengeri (JPBN), sampel nya dianjung kena 10 Ogos 2017 ke alai kededua ari Kampung Kuala, Jalai Gedong, Serian.
Enggau nya, penyampau sampel positif virus Rabies nyentuk ngagai diatu iya nya 36 sampel ukui enggau 6 mayau ari semua 10 pemutus peresa ke diterima ari VRI, Ipoh.
Kelimpah ari nya, 139 iku ukui udah dituchuk vaksin Rabies di 10 genturung pendiau di Serian kemari.
Nyentuk ngagai kemari, 31,815 iku jelu ke mungkur 24,173 iku ukui, 7,597 iku mayau enggau 45 iku jelu bukai udah betuchuk vaksin nya.
Program betuchuk vaksin ukui diketu ba Hari Lima, 18 Ogos 2017 ngambi ulih meri awak ngagai program betuchuk vaksin Rabies ngagai orang gawa virus Rabies.
Program deka ditampung ba Hari Enam 19 Ogos di Kampung Panchor Dayak enggau Panchor Cina, Kampung Semada Belatok, Semada Mawang enggau Semada Tengah,Kampung Semukoi A enggau Semukoi Empegang.
Program mega bisi diatur di Kampung Sungai Apeng, Slabi Entukuh, Sungai Buruh dan Singai Turong, Kampung Stigang Semukoi, Tian Mawang danTian Sekawan sereta Kampung Tapang Maong, Muara Tangga enggau Beruan.
Ngenang kaul ke sama, Opis Pengerai Nengeri (JKNS) madah 86 kes ketup ukui bisi diripot kemari.
Lapan kes nyadi di Pelilih Serian, empat di Sri Aman, 71 kes di Kuching enggau 3 kes di Samarahan.
Enggau nya penyampau kes ketup ukui kenyau 1 April 2017 nyentuk ngagai kemari manggai 2,586 kes ke alai 996 iku orang udah betuchuk vaksin anti-Rabies.