KANOWIT: Seiku apai tuai enggau dua iku anak lelaki iya antara lima iku ditan polis ba sebengkah pengawa ngabas ngenyit di sebuah rumah panjai ba Sungai Bawan, Jalai Nibong-Tada ditu, malam kilah ensanus.
Ketuai Polis Pelilih Kanowit, Daniel Desmond Benjamin madahka bala suspek nya beumur antara 24 ngagai 52 taun, ditan ketegal dipelaba bisi kaul enggau penyalah sereta gian dadah.
Belalauka penerang ari mensia mayuh, seraban Taskforce IPD udah datai ngenyit ngagai endur nya urung pukul 9 malam Hari Empat tu tadi.
Ku iya, sida ti datai ngenyit ngagai endur nya lalu mujur ngerampas sepikit bungkus ti ngembuan utai dipelabaka dadah.
“Tiga iku suspek iya nya seiku apai tuai enggau dua iku anak iya sereta dua iku agi bakih ditemu positif dadah ‘Methamphetamine’ enggau ‘Amphetamine’ lebuhka diperesa polis ai kemi ba keterubah,” ku iya lebuhka dikerandau.
Ku iya, polis mega ngerampas sekeda kereban enggau instrumen ti dikena gian dadah baka jerumat dikena nuchuk enggau dua buah kerita.
Berindik ari nya, Desmond ngelalau semua tuai rumah tauka ketuai genturung pendiau di pelilih tu ngambi ngemeratka sereta matau semak agi aktiviti nembiak redak sida dikena nentuka sida enda ngereja ulah enda menuku baka tu.
Ku iya, udah nyadi tenggungpengawa bala tuai rumah empu nentuka nadai seiku nembiak redak dipegai iya ngaul diri ba aktiviti ti deka ngamah ukai semina pemanah nama rumah panjai tang mega pelilih tu.
“Pelilih Kanowit iya nya sebuah pasar ti likun sereta ngembuan tikas penyalah ti baruh endar. Kami deka nyaga pemanah nama nya,” ku iya.
Ba pengawa sida nagang penyalah ba pelilih tu, ku iya, sida benung chakah ngatur program ‘Polis Masyarakat Berpisah Tiada’ begulai enggau JPKK nengah licha sereta randau ba rumah panjai minta raban komuniti ba menua nya bekerejasama enggau polis ba pengawa ngemunas sereta nagang penyalah.
Ditanya silik pasal kes nya, Daniel madahka dadah ti dirampas dipelabaka dadah bansa syabu.
“Kami deka nganjung dadah ti dirampas ngagai Opis Kimia ngambika diperesa dikena nentuka bansa utai nya sereta penyampau berat iya,” ku iya.
Tandu iya, semua suspek diatu ditan ba rumah pasung seraya nganti perintah riman ngambika dipansik.
Kes tu deka dipansik ari baruh Seksyen 12 (2) Akta Dadah Berbahaya 1952.