KUCHING: Palan Pemansang Pengelandik Sarawak (PPKS) deka terus meri komitmen nempa modal mensia ti ngembuan pengelandik dikena nyaup nembuka langkar pemansang perintah, nyengkaum ti bekaul enggau Ekonomi Digital.
Chairman PPKS Tan Sri Datuk Amar Abdul Aziz Husain madahka, PKKS kelebih agi mantu nyaup nembuka pengawa ke benung dipejalaika perintah dalam mayuh bidang dikena ngemansangka modal mensia ke bepenemu.
“Nyadi piak ke amat beguna dalam pengawa ngemajuka modal mensia enggau nengeri, endang amat beguna kitai gawa nyadi seiti tim dalam pengawa ngemansangka modal mensia.
“Kitai begulai enggau perintah patut beserakup napi peminta guna nengeri ngadaka pengereja pengawa ke bisi pengelandik enggau pemandai, dikena nyapai batang tuju ke dipadahka Yang Amat Berhormat Ketua Menteri,” ku iya.
Ku iya ti mega Presiden Kolej Teknologi Lanjutan Antarabangsa Sarawak (iCATS), kepala menteri apin lama ke udah madahka perintah nengeri deka bejalaika mayuh inisiatif dikena ngenyampatka arus pemansang.
Iya mansutka pekara nya lebuh bejaku bejadika ‘Simposium Pengelibatan Industri’ ke diatur PPKS/iCATS ke sama bisi digulu Direktor Eksekutif PPKS Hallaman Sabri ditu, kemari.
Nitihku Abdul Aziz, dikena mantu perintah, PPKS udah nyendiaka mayuh program Setipikit Pengelandik Malaysia (SKMP) enggau Diploma Pengelandik Malaysia (DKM).
“Mayuh program baru udah diperambu begulai enggau ‘Persekutuan Pusat Pembangunan Kemahiran Malaysia’ (FMSDC) baka program Malaysia Meister (MMP) dalam bidang mekatronik, elekterik enggau elektronik sereta automotif.
“Apin lama mega, PPKS ke nyadi Palan Penyulut Teknologi (CoET) dikemendarka ngatur Matih sereta Ngenukuka Seitpikit dalam program ‘Pemerkasaan Kebangsaan’ ungkup Rebak Pengereja Pengawa Ti Deka Datai (NECT-Gen-Industry 4.0) ngambika kompeni meri ngagai Wang Turu Pemansang Orang Gawa (HRDF),” ku iya.
Kelimpah ari nya, Hallman lebuh ke bejaku madahka simposium ke diatur nya negemeratka beberapa isu bekaul enggau pengaji enggau peluang latih ngagai pengereja pengawa baka tanggungpengawa HRDF, penguntung skim perantisan, pemesai guna pengelandik enggau ke bukai.
“Senipak enggau pengawa ke benung dipejalai dikena ngelakuka pemesai guna industri dalam pengawa meri latih gawa enggau ngangkatka tikas penyikar, PPKS merambu deka ngatur program ke sama di mengeri bukai di Sarawak, kepenguntung kaban enggau industri,” ku iya.
Ku iya, PPKS bebendar deka nyapai juluk nempa orang gawa ti sikar sereta ngembuan tikas penemu ke chukup enggau pemansang sereta pelajar ke enda putus.
Dikena nyapai juluk nya ku iya, PPKS udah ngenegapka kerejasama enggau mayuh bengkah industri dikena ngerapitka kaul enggau piak industri.