MIRI: Rayat nyukung chara ti pemadu baru meri agih belanja perintah ke udah dimunka Kaban Kunsil Nengeri (ADUN) Marudi Datu Penguang Manggil.
Agih belanja sepenyampau RM3 juta ke dipadahka iya kena Hari Tiga tu tadi deka diberi terus ngagai akaun bank komiti rumah panjai ti enda agi nengah piak ketiga tauka kunteriktor projek.
Tuai Rumah (TR) Rumah Panjai Benang Sungai Bakas Benang Pilang madah, inisiatif tu keterubah digaga iya nya rayat empu bisi hak ngaga pelin kediri empu bekaul agih belanja ti diberi perintah nya.
“Aku ngarapka konsep ti baka tu deka diteruska Penguang ngambi semua projek infrastruktur di kandang menua kitai ulih digaga enggau lengkas,” ku iya lebuh ditanya pengarang berita rambau atur pengawa madahka agih belanja RM3 juta ari Penguang di Beluru, Bakong kemari.
Kelimpah ari nya, TR Rh Panjai Sungai Terungan Sara Angal madah, inisiatif baka tu endang dikearap peranak rumah panjai iya nya seiti chara ADUN ngetanka hak rayat ti dipegai sida.
“Pemisi agih belanja tu deka dikena kami ngemanahka infrastruktur di genturung pendiau kami ngambika enda tinggal ari arus pemansang di genturung pendiau bukai.
“Tanah ti suah tusur di kandang endur rumah panjai kami makin nyadi, agih belanja tu deka dikena ngemanahka gaya tanah di taba ngambika tan agi kena timpuh ti lama,” ku iya.
Ba kenang ke bukai, TR Rumah Larek Bukit Jelutong madah, iya asai temegah ati enggau agih belanja ke diberi nya kena ngemansangka infrastruktur ungkup komuniti Penan.
“Diatu rumah panjai kami bisi 28 pintu bilik, ketegal nya kami beguna taba besai agi laban penyampau ruang bilik majak nambah.
“Agih belanja tu deka dikena ngiga taba baru ungkup ngemanjaika rumah panjai Larek jemah,” ku iya.
Agih belanja ti besai tu ngena chara beripai, iya nya peranak di tetiap rumah panjai bekerejasama nirika infrastruktur di genturung pendiau sida tang enda nengah tauka begunaka piak ti ketiga (kunteriktor).
Ku Penguang, inisiatif tu digaga kena meri rayat ba sitak dipegai iya ngasaika agih belanja ti diberi lalu nyeliahka bisi pekara agih belanja perintah ti lenyau laban piak ketiga tauka enda chukup.