KUCHING: Gerempung Pengajar Sarawak (STU) enda mantah pemadah ti dibantaika Menteri Pelajar Datuk Seri Mahdzir Khalid ti deka mai pengajar jalai pengarap ukai peranak Sarawak ngajar di sekula Sarawak dikena ngisi pengawa puang ungkup pengajar Pelajar Islam di nengeri tu.
“Baka ti ditemu, kitai suntuk pengajar ba jalai pengarap peranak asal menua tu di Sarawak naka diatu, kitai patut ngambi sida. Sapa deka ngajar subjek jalai pengarap? semina pengajar jalai pengarap ti patut aja ulih. Nyema kitai dekaka pemutus ke menyana tauka asil ke manah, kitai begunaka pengajar jalai pengarap landik.
“Laban Sarawak diuan pupu bansa, STU ngarapka sida tu patut ulih ngaul diri enggau gaya,adat sereta gaya pengidup ditu, kelebih agi lebuh sida dianjung ngajar di menua pesisir enggau menua ulu di Sarawak,” ku Presiden STU, Jisin Nyud madah ngagai The Borneo Post kemari.
Jisin dipinta mantaika penemu pasal pemerat pengawa nganjung pengajar jalai pengarap ukai peranak Sarawak ngagai sekula di Sarawak, kelebih agi ba kandang menua pesisir, berindik ari kes-kes mit ti kala nyadi, ke alai pengajar jalai pengarap ditemu nguji nukar jalai pengarap bala nembiak sida.
Ku Jisin patut nadai isu ba pekara nya nyema pengajar tu diterang enggau manah tauka dipadah Opis Pelajar Sarawak tauka Opis Menteri Pelajar.
Endang ditemu ukai peranak Sarawak dianjung gawa ngagai nengeri tu deka ngulu program orientasi ti diatur Opis Pelajar nengeri, ke alai sida deka diterang pasal adat enggau gaya pengidup enggau sensitiviti peranak nengeri tu.
“Kelimpah ari nya, sida ke datai deka ngajar di Sarawak, ukai nukar jalai pengarap nembiak. Mereti sereta bebasaka pangan diri beguna endar kelebih agi di nengeri baka Sarawak alai peranak datai ari pupu bansa, raban etnik enggau jalai pengarap. Tu ngasuh nengeri kitai ngembuan mayuh adat enggau gaya pengidup. Pekara ti patut diperunding, aram kitai bela ngetanka pengelikun enggau pengelantang nengeri tu.”
Nitih ku Mahdzir, penanggul suntuk pengajar ke ngajar subjek Pelajar Islam di Sarawak chukup kritikal diatu, nya kebuah opis menteri iya deka mai pengajar ari Semenanjung Malaysia enggau Sabah ngajar subjek nya di Sarawak.
Ku iya, pengawa ngatur udah dipesetuju Kepala Menteri Datuk Amar Abang Johari Tun Openg. Ngaku Sarawak merambu nyapai nisbah 90:10 pengajar menua tu, iya madah pemutus tu atur khas kena mutarka penyuntuk pengajar ke baka nya.