GPS udah dikemendarka Menteri Dalam Menua
Dikarang Judan Bungap
SIBU: Chairman Gabungan Parti Sarawak (GPS) Datuk Patinggi Abang Johari Tun Openg beterima kasih ngagai Menteri Dalam Menua Tan Sri Muhyiddin Yassin ketegal udah ngemendarka penumbuh GPS.
Kepala Menteri nya madah, pemutus nya deka ngelantangka sida bejalaika pengawa ngagai rayat.
"Enggau tu, kitai (GPS) deka nandu tanggungpengawa dalam menua demokrasi sereta mai pemaik ngagai nengeri Sarawak enggau Malaysia.
"Kerejasama dalam parti mega nentuka pemaik menua lebih agi nengeri Sarawak," pia ku iya maya berandau enggau media di Sibu, sehari tu.
Dulu agi ari tu, Muhyiddin mantaika pemutus nya ba parlimen maya nimbal tanya Sekretari Besai GPS Datuk Alexander Nanta Linggi bekaul enggau pemutus pengawa ngerejister GPS.
Ditanya bekaul enggau kemaya lambang GPS dipenyadi, Abang Johari madahka iya nganti penerang ke silik kelimpah udah nya belabuh ngatur perambu parti sida.
Kelimpah ari nya iya mega madahka diri empai ulih nyemetak nimbal tanya sentang bisi parti bukai deka nyemilik GPS nangkan ke tu.
"Nganti dulu...Tang GPS udah bisi sempekat enda sebaka enggau Barisan Nasional (BN) suba.
"Enti tiga per empat (komponen parti) besetuju dia peminta tama dalam GPS deka diperundingka.
"Ba BN suba meseti 100 peratus," ku iya nimbal tanya.