KUCHING: Projek pemansang TEGAS Lodge Sarawak (TLS) ti deka dikemansangka ba kandang endur pemesai 15 ikar semak enggau Perkampungan Digital TEGAS (TDV) ditu, diadang berengkah taun baru.
Sapit Menteri Langgur Mengeri, Administrasyen Tanah enggau Rampa Menua Datuk Len Talif Salleh madahka, pelin projek nya udah diberi ngagai Pihak Berkuasa Perancangan Negeri (SPA) kena minta pemendar.
Ku iya, Premieri Sarawak Datuk Patinggi Tan Sri Abang Johari Tun Openg taun nyin kemari sechara prinsip udah setuju ke Tabung Ekonomi Gagasan Anak Sarawak (TEGAS) ngaga projek nya.
"Pengawa ngaga TLS deka berengkah taun baru. Pelin projek udah dikenataika ngagai SPA, sereta kami ngarap ulih dikemendarka dalam taun tu.
"Begunan TDV ke udah bisi udah digaga ba tanah pemesai lima ikar.
"Ba belakang nya bisi 15 ikar agi deka dikena alai ngemansangka projek baru nya," ku iya lebuh dirandau pengudah bejadi program Think and Tinker Mini Lab Battlefield di TDV, Taman Perindustrian Teknologi Tinggi Samajaya ditu, ensanus.
Ngenang silik, Len Talif ti mega Chairman TEGAS madahka, projek ti digaga ngena kos urung RM70 juta tu deka disikap ngena mayuh bengkah perengka guna, nyengkaum hotel, dewan bekapasiti lebih 500 iku, gimnasium, spa enggau ti bukai.
Ku iya, tuju projek nya kena matak digital nomad, lebih agi ari luar menua, ti deka gawa enggau nemuai ke Sarawak.
"Diatu, di serata dunya, lebih agi di Sepanyol, Portugal, Amerika, Bali enggau Singapura, bisi digital nomad ti bejalaika dagang ari luar menua enda ibuh gawa ba opis," ku iya.
Berindik ari pikara nya, iya ngarapka pengawa ngaga projek nya ila bisi prinsip tauka gaya baka Silicon Valley di Amerika Syarikat.
"Ia ngambi ke kitai ulih ngemansangka pengereja pengawa ti bepelasarka teknologi, nyengkaum Pemintar Artifisyel (AI) enggau ti bukai," terang iya.
Dulu ari nya, Len Talif nyuaka perais ngagai pemenang Think and Thinker (T&T) Mini Lab Battlefield, dipasuk lebih 200 penyereta nyengkaum nembiak sekula primari enggau sekondari ari 11 sekula di serata Sarawak, ti diatur berenggat berengkah Mac taun tu.
Lima raban ti pemadu manah deka bepekit ba renggat kepenudi ti diatur ba Perkampungan Digital TEGAS kenyau 27 September tu tadi.
Program nya siti ari chara kena ngubah, mandang enggau meri runding ngagai individu lebih agi raban biak ngena inovasyen enggau teknologi pengabis baru nyengkaum Microbit, Cetakan Tiga Dimensi (3D Printing), Mbot Robotics, pemprograman dron enggau Kemahiran Berfikir Secara Inovatif sereta Teknik Pembentangan Projek Berkesan.