Anda di sini

Servis ti manah ungkup rayat kelai penyiru perintah dalam megai menua

Advertisement
Ting (tengah) begambar kenang begulai enggau pengereja pengawa KKM maya Pengerami Makai Lemai SMSU Pampang Sibu kena malam Hari Enam.
Ting (tengah) begambar kenang begulai enggau pengereja pengawa KKM maya Pengerami Makai Lemai SMSU Pampang Sibu kena malam Hari Enam.

SIBU: Tikas pengulih pengereja pengawa perintah dalam meri servis ngagai rayat ngayanka pemanah perintah dalam megai menua.

Menteri Dagang Temuai, Seni enggau Ba Dato Sri Tiong King Sing madah, tikas pengulih pengereja pengawa perintah dalam meri servis ungkup rayat mega mantaika pemanah perintah dalam meretika runding rayat.

“Tu mih tanggungpengawa kitai ti patut dipejalaika seagi kitai tu megai pangku pengawa pengereja pengawa perintah. Kitai mesti bekerejasama enggau perintah dalam ngangkup guna enggau peminta rayat,” ku iya dalam teks jaku iya ti dibacha Sekretari Politik Premier Sarawak Joshua Ting ti nyadi pengari iya datai maya Pengerami Makai Lemai Gerempung Pengereja Pengawa Perubat Sarawak (SMSU) Pampang Sibu ti diatur ba sebuah hotel ditu kena malam Hari Enam.

Sama datai iya nya Chairman SMSU Pampang sibu Muhd Najib Abdul Halim.

Tiong ti mega Kaban Parlimen Bintulu madahka pengereja pengawa perintah patut nemu tanggungpengaw diri empu.

Pia mega, ku iya, enggau pemisi ke bisi sereta sukung ti diberi sida, iya pechaya Opis Menteri Pengerai Malaysia (KKM) deka meri servis pengerai ti pemadu manah ngagai rayat di menua tu.

Nitih ku iya, pengereja pengawa KKM iya nya sida ti nyadi terabai menua ti komited dalam bejalaika tanggungpengawa dikena nentuka rayat enggau menua tu seruran likun enggau gerai.

“Kita mih 'unsung heroes', tang ulih meri empas ti besai taja kita enda berasai. Pengeransing ti diberi ngagai komuniti tu kebendar nya mantu kita nengah penguji rampa pengawa enggau pengerai ti mayuh pemar.

“Nyadi kaban KKM, aku endang ngarapka kita semua terus komited dalam nentuka servis pengerai di Malaysia kelebih agi di Bintulu entara ti pemadu manah,” ku iya ti mega Kaban Kunsil Nengeri (ADUN) Dudong.

Tiong mega ngelalau ngagai semua raban KKM ngambika seruran meri servis ti pemadu manah enggau profesional ngagai semua rayat ti enda ngira penatai asal.

Iya nyemetak madah ngambika meri pemerat ngagai pengawa beraban ngambika tu nentuka ti meri empas ti manah, proaktif, dinamik enggau produktif.

“Seruran mantu enggau ati ti lurus sereta penuh tanggungpengawa enggau komited dalam nyapai juluk opis kelebih agi Opis Menteri Pengerai Malaysia enggau menua.

“Pengawa manah perintah tu patut bisi dalam runding tetiap raban KKM, laban tetiap pengereja pengawa perintah iya nya injin ti besai ngagai perintah dalam ngenataika pengingin perintah ngagai rayat,” ku iya.

Tiong mega nambah iya nya iya seruran nyukung dalam nyungkak aktiviti dalam gerempung entara raban pengereja pengawa perintah kelimpah ari meri basa ngagai pengawa ti dipegai sida dalam nentuka program ulih dipejalaika enggau manah.

Advertisement