Anda di sini

Pengawa ngabang ulih ngerapitka kaul, ngenegapka penyerakup

Advertisement
Harden berandau enggau bala peranak rumah panjai seraya disempulang Rose Emma (kanan) lebuh ti datai ngulu pengerami tu kemari.
Harden berandau enggau bala peranak rumah panjai seraya disempulang Rose Emma (kanan) lebuh ti datai ngulu pengerami tu kemari.

SRI AMAN: Program Ngabang Gawai iya nya tradisyen ngabang enggau pangan diri ti dipejalaika kenyau ari suba kelai nyukung program ngatur Gawai ba sebuah rumah panjai.

Sapit Menteri Pelajar, Inovasyen enggau Pemansang Penau Sarawak Datuk Francis Harden Hollis madah, kelia penatai pengabang mega sama mantu dalam ngatur Gawai.

Tang, kemaya hari tu, pengawa ngabang agi diatur semina konsep enda sama lalu diatu lebih ngagai mantaika identiti adat enggau budaya komuniti Dayak ti ngena ngepan asal bansa diri.

Harden ti mega Kaban Kunsil Nengeri (ADUN) Simanggang madah munyi tu lebuh ti bejaku maya Pengerami Ngabang Gawai ke Rumah Rose Emma, Kampung temudok Atas ti diatur Raban Orang Indu Parti Sa'Ati Rayat Sarawak (SUPP) Pampang Simanggang ditu ensanus.

Iya nambah, dalam ngenegapka budaya, tetiap raban bansa patut mantaika ngepan tradisional ngambika ditemu penatai asal bansa tu.

Kelimpah ari tu, bala sida ti datai mega ulih betukar penemu seraya ngerapitka kaul bekaban dalam nentuka pengelantang enggau penyerakup bansa dalam komuniti pupu bansa.

Maya pengerami tu sama mega bisi diatur muka kaunter 'Mobile Service2U' ari Raban Orang Indu SUPP Pampang Simanggang enggau tuju ngiga kaban baru nyemilik parti sereta mega nyuaka hamper bakul pemakai ngagai bisi sepuluh iku oenerima ba rumah panjai tu.

Dulu ari tu, bakul pemakai tu diberi Kapitan Ling Siew Hung ti mega Chairman Raban Orang Indu SUPP Pampang Simanggang ti mega Sekretari Eksekutif Palan Servis Komuniti DUN Simanggang.

Maya pengerami tu, Harden mega nyuaka geran sepenyampau RM5,000 iya nya bela RM3,000 ungkup Komiti Pemansang enggau Pengelikun Genturung Pendiau (JKKK) Kampung Temudok Atas lalu RM2,000 ungkup Biro Orang Indu ti diguna kena melanja aktiviti gerempung ti bisi meri pemaik ngagai komuniti.

Sama bisi datai maya program tu iya nya Pemancha Lee Siang Hua, Penghulu Andar Suntai, Penghulu Tiong Chong Onn, Penghulu Empaga Bailey, Penghulu Kang Tai Kong, Kapitan Ling Siew Hung, Kapitan Tay Siaw Chuan, Kapitan Chin Chong Miaw, Kapitan Kiew Sii Ted, Kapitan Lai Joon Phin, Kapitan Sii Tong Kang enggau ketuai komuniti ke bukai.

Advertisement