Anda di sini

Sarawak, UM berandauka penumbuh fakulti undang-undang nyengkaum bidang NCR, MA63

Advertisement
Abang Johari maya datai ba Sesi Townhall di Universiti Malaya, Kuala Lumpur. Gambar Opis Premier Sarawak 
Abang Johari maya datai ba Sesi Townhall di Universiti Malaya, Kuala Lumpur. - Gambar Opis Premier Sarawak 

KUCHING: Perintah Sarawak dalam randau enggau Universiti Malaya (UM) ngambika universiti nya numbuhka Fakulti Undang-Undang di negeri tu.

Premier Datuk Patinggi Tan Sri Abang Johari Tun Openg madahka fakulti ke endang udah bisi di Kuala Lumpur enda nyengkaum subjek undang-undang bekaul enggau Sarawak baka Hak Adat Bumiputera (NCR) enggau Sempekat Malaysia 1963 (MA63). 

"Aku madah iya nya ngambika ditumbuhka Fakulti Undang-Undang tang kitai nadai orang ti kuat ba universiti perintah bebida enggau Universiti Swinburne ti dikeempu perintah Sarawak.

"Nya alai aku ti nyadi chairman Swinburne Sarawak, meri sadang penemu disediaka pelajar undang-undang ti bisi di Sarawak nyengkaum NCR pengelama du taun di Swinburne. 

"Enti aku minta UM nyendiaka, ia mayuh nengah mayuh orang sereta bedau temu ulih dipejalaika, tang diatu UM bisi nyebut numbuhka Fakulti Undang-Undang di Sarawak," ku iya.

Iya madahka pekara nya maya Sesi Townhall diatur Persatuan Mahasiswa Sarawak di Auditorium Fakulti Perniagaan dan Ekonomi, UM di Kuala Lumpur kemari.

Sama bisi ngulu Menteri Utiliti enggau Telekomunikasyen, Dato Sri Julaihi Narawi; Sekretari Perintah Sarawak, Datuk Amar Mohamad Abu Bakar Marzuki;  Peguam Besar Negeri Sarawak, Datu Saferi Ali; Mandal Canselor Universiti Malaya, Dr Noor Azuan Abu Osman sereta sida ti bukai. 

Ku Abang Johari, uudang-undang baka MA63, Suruhanjaya Cobbold, Laporan Jawatankuasa Antara Kerajaan (IGC) nyengkaum undang-undang bekaul enggau asal Sarawak baka NCR  mega patut dipelajar.

"Diatu kitai benung berandau enggau UM ngambika sida ti ngampi pelajar undang-undang tu dua taun ditu (Sarawak) enggau dua taun din (Kuala Lumpur).

"Kitai mega begunaka luya ti manah, ulih mansik pekara ti baru enggau ulih mantu kami dalam perintah ngelangkar undang-undang baru," ku iya.

Ku Abang Johari bejaku baru, kus undang-undang mega patut berubah nilihka pemansang diatu.

Ambika chunto ku iya Sarawak diatu begunaka mayuh agi orang ti landik enggau pandai pasal pengelikun siber enggau pengemeran undang-undang patut nyikap diri empu ba pekara baru tu.

Dulu ari nya maya meri pugu jaku ba Sesi Townhall nya, Abang Johari bekunsi pasal inisiatif perintah Sarawak dalam ngemansangka nengeri tu bulih status nengeri maju bepenatai pemisi tinggi ba taun 2030. 

Entara pekara ti bisi dikenang Abang Johari iya nya pasal mulaika hak Sarawak bepelasarka MA63, Strategi Pemansang Pengudah Covid-19 (PCDS) 2030 sereta energi gadung. 

Advertisement