Anda di sini

Sarawak diberi penendur milih chara kena ngangkatka sistem pelajar ti chakah, efektif

Advertisement
Sagah ngarika Uggah malu gendang kelai bejadi Bazar Gawai Dayak 2024 ti diatur di MJC Batu Kawa, ditu, malam ensanus. - Gambar Mohd Faisal Ahmad
Sagah ngarika Uggah malu gendang kelai bejadi Bazar Gawai Dayak 2024 ti diatur di MJC Batu Kawa, ditu, malam ensanus. - Gambar Mohd Faisal Ahmad

 
KUCHING: Sarawak diberi penendur ngena enda ngira nama chara kena ngangkatka sistem belajar di nengeri tu lebih efektif enggau chakah.

Menteri Pelajar, Inovasyen enggau Pemansang Penau, Dato Sri Roland Sagah Wee Inn madahka, sida iya bisi betemu enggau Opis Menteri Pelajar Malaysia (KPM) berandauka pasal chara ngajar ti efektif ba sekula.

Nitihka iya, asil ari pengawa betemu nya apin ulih dipadahka laban agi dalam proses enggau pengawa berandau agi dipejalaika.

"Engka sechara rama aku ulih madah pasal sekeda mindahka kuasa... Aku enda nyebut tu autonomi tang mindahka kuasa.

"Sida (KPM) mega meri kitai penendur mimit dalam ngaga pemutus pasal chara enggau sistem ti deka dikemeran kena ngangkatka chara ngajar lebih efektif, di Sarawak.

"KPM sepemanjai berandauka pekara tu endang meri tanggung pengawa enggau kerejasama ngagai kitai," ku iya.

Iya madahka pekara nya lebuh dirandau raban media pengudah ngarika Sapit Premier Sarawak Datuk Amar Douglas Uggah Embas bejadi pengerami Bazar Gawai 2024, di MJC Batu Kawa, ditu, malam ensanus.

Sagah madahka, opis menteri iya agi bisi pekara ti deka dirandau enggau KPM.

"Kami agi bisi sekeda pekara deka diputarka enggau sida sereta sekeda pekara nya patut bulih setuju ari sida mega.

"Kitai mesti bisi bulih jaku setuju ari sida laban sida agi nyaga pelajar, nya alai, enti kitai minta Opis Pelajar ngambika nempa kerejasama enggau kitai, tu deka ngemuntangka agi," ku iya.

Sama bisi datai, Sapit Menteri Pengangkut ti mega Chairman Pengatur Bazar Gawai Dayak 2024 Dato Henry Harry Jinep; Sapit Menteri Pelajar, Inovasyen enggau Pemansang Pena ,Datuk Francis Harden Hollis; Sapit Menteri Utiliti enggau Telekomunikasyen Sarawak Datuk Liwan Lagang, Sapit Menteri Industri Pemakai, Komoditi enggau Pemansang Wilayah Sarawak Datuk Martin Ben, Kaban Kunsil Nengeri (ADUN) Serembu ti nyadi Sapit Chairman Pengatur Bazar Gawai Dayak 2024 Miro Simuh enggau sida ti bukai.

Advertisement