Anda di sini

Orang biak diperansang pintar ngerebut peluang kereja dalam sektor industri: Dr. Rundi 

Advertisement
Dr Rundi malu tawak tujuh kali kelai bejadi Pengerami Mantar Gawai Dayak Pelilih Menua Sebauh 2024 di Bintulu, malam Hari Lima.
Dr Rundi malu tawak tujuh kali kelai bejadi Pengerami Mantar Gawai Dayak Pelilih Menua Sebauh 2024 di Bintulu, malam Hari Lima.

BINTULU: Orang biak lebih agi nembiak tembu besekula enggau institusyen pelajar tinggi patut pintar ngerebut peluang kereja dalam sektor industri ti ngerembai amat jampat diatu.

Menteri Industri Pemakai, Komoditi enggau Pemansang Wilayah, Dato Sri Dr Stephen Rundi Utom madahka, rebak biak ti ulih ukai semina patut minta kereja, tang patut ngena penau megai pangkat beguna dalam tiap sektor.

"Nama ti beguna iya nya rebak biak bisi semekih tinggi kena nentuka sida ulih meri servis bekualiti, ti lalu ngerembaika sektor industri enggau industri hiliran," ku iya.

Iya madahka pekara nya maya bejaku ba Pengerami Mantar Gawai Dayak Pelilih Menua Sebauh 2024 ba Balai Raya Sebauh ditu, malam Hari Lima.

Kaban Kunsil Nengeri (ADUN) Kemena nya madahka, suba enda mayuh rayat menua tu nemu tauka aktif dalam sektor industri, lebih agi minyak enggau gis di Bintulu," ku iya.

Dr. Rundi madahka, diatu sektor industri ngerembai amat jampat di Taman Perindustrian Samalaju (TPS) enggau peluang ti manah ngagai raban biak bulih kereja nitihka penau enggau pemandai diri.

Nya alai ku iya, raban biak anang kelalu enggai kiruh tang patut bebendar ngiga kereja dalam mayuh bengkah sektor ti mayuh disediaka awakka enda tinggal.

"Nambah nya, pemansang kereban enggau infrastruktur dipajakka di kandang sitak Kemena, lebih agi jalai raya ti nyambungka enggau kandang menua ulu enggau mengeri," ku iya.

Nitihka iya, tu nyengkaum Jalai Tubau-Jelalong, enggau Jalai Ulu Pandan ti udah tembu renggat keterubah enggau kedua sereta deka diteruska ba renggat ketiga.

Sama bisi datai Residen Bagi Menua Bintulu Nyurak Keti, Pemesai Pelilih Menua Sebauh William Manggoi, Sekretari Politik Premier Sarawak Collin Patan enggau Temenggung Limin Anai.

Advertisement