Anda di sini

Kerejasama bulih raban ditagit nengah program pengerai chukup diperansang

Advertisement
Dayang Nurfizawati (duduk) sama enggau beperesa pengerai ba reruai ti nyendiaka servis nya.
Dayang Nurfizawati (duduk) sama enggau beperesa pengerai ba reruai ti nyendiaka servis nya.

KUCHING: Perintah amat meransang kerejasama entara ejensi iya, gerempung ukai dikuasa perintah (NGO) enggau sektor swasta awakka ulih nyapai raban ditagit nengah program pengerai ti diatur.

Sekretari Politik ngagai Premier Sarawak Dr Dayang Nurfizawati Abang Abdul Karim madahka, kerejasama ti baka nya mega ngemuntangka raban ditagit bulih servis ari baruh siti perabung.

"Ditu (program Kem Meresa Pengerai) kitai mayuh meda penyedia servis perubat ari ejensi perintah, NGO kelimpah ari sektor swasta.

"Tu kerejasama ti chukup manah sereta ari perintah, kami chukup meransang kerejasama ti baka tu kena nyapai raban ditagit," ku iya.

Iya madahka pekara nya maya bejadi Kem Meresa Pengerai 2024 diatur Lions Club of Kuching Unity ti bisi digulu Presiden iya  Manjeet Sidhu ditu, kemari.

Dayang Nurfizawati ngarika Sapit Menteri ba Opis Premier Sarawak (Undang-Undang, MA63 enggau Kaul Sarawak - Perintah Besai) Datuk Sharifah Hasidah Sayeed Aman Ghazali.

Dayang Nurfizawati ngarapka program ti sebaka ulih diatur di serata nengeri, nyengkaum ba kandang menua pesisir enggau menua ulu.

Kebuh pia, ku iya, laban program nya ti enda bebayar mega deka meri penyedar tumu ngagai komuniti pasal penyakit.

"Aku ngarapka program tu ukai naka tu aja tang patut terus dipejalaika. Program nangkan tu diatur di Kapit enggau semua bagi menua di nengeri tu.

"Program tu tuju ia kena nyapai raban ditagit, nentuka sida kiruh tauka nemu pasal pengerai," ku iya.

Iya madahka ditemu tumu ulih mantu nyaga pengerai enggau pengelantang rayat.

"Tumu agi ditemu manah agi, tumu agi kitai nemu tikas penyakit sereta deka tumu agi kitai berubat nitihka pematut," ku iya.

Advertisement