Anda di sini

Bazar Gawai Dayak platform pengerembai, pemeransang aktiviti peranak lokal: Uggah 

Advertisement
Sagah (kanan) ti ngarika Uggah bejadi Bazar Gawai Dayak 2024 ngujika pengelandik ajat Bidayuh begulai 'Bidayuh Ring Ladies', seraya disempulang Henry (kiba), malam Hari Lima. -Gambar Mohd Faisal Ahmad
Sagah (kanan) ti ngarika Uggah bejadi Bazar Gawai Dayak 2024 ngujika pengelandik ajat Bidayuh begulai 'Bidayuh Ring Ladies', seraya disempulang Henry (kiba), malam Hari Lima. - Gambar Mohd Faisal Ahmad

KUCHING: Bazar Gawai Dayak 2024 diatur iya nya siti ari program ti setipak enggau rambai jaku Bajet Sarawak iya nya 'Pemansang Ungkup Semua: Sama Nempa Sarawak Lantang, Meruan enggau Beserakup.'

Sapit Premier Sarawak Datuk Amar Douglas Uggah Embas madahka, bazar iya nya entara aktiviti bisnes ti lebih ngagai pengerembai enggau pemeransang aktiviti peranak lokal tauka kandang endur nya empu.

"Perintah Sarawak seruran sensitif ngagai peneka rayat sereta tu ulih dipeda kitai ba rambai jaku bajet taun tu iya nya  'Pemansang Ungkup Semua: Sama Nempa Sarawak Lantang, Meruan enggau Beserakup.'

"Ia ukai semina nyadika penyanding, tang rambai jaku nya mega ngayanka pengamat komitmen perintah Sarawak ngagai rayat iya," ku iya.

Uggah madahka pekara nya dalam teks jaku iya ti dibacha Menteri Pelajar, Inovesyen enggau Pemansang Penau, Dato Sri Roland Sagah Wee Inn ti ngarika iya bejadi pengerami Bazar Gawai Dayak 2024 di MJC Batu Kawa ditu, malam ensanus.

Uggah meransang orang bejual tauka bedagang ngambika nguna peluang Bazar Gawai Dayak nya ngelakuka produk sida.

"Ambi awak ba bazar tu nyadi platform betemu sereta betukar penemu enggau bakih sama orang dagang kena ngerembaika pengawa dagang," iya.

Nambah nya ku iya, ngatur Bazar Gawai Dayak ke sekali tu ngemeratka budaya dalam komuniti, bala raban biak enggau pengemeran seni.

"Aktivitib ke diatur ba bazar tu meri peluang ngagai pengemeran seni ba endur tu empu mantaika penau seraya ngiga penau baru enggau meri pengaku ngagai pengemeran seni ti patut," ku ya.

Kelimpah ari nya, Sapit Menteri Pengangkut Sarawak ti nyadi Chairman Pengatur Bazar Gawai Dayak 2024, Dato Henry Harry Jinep madahka, bazar diatur endang dilanggur enggau silik ti lalu mujur meri awak bejalaika 18 aktiviti ari baruh tiga kluster besai.

Ku iya, tiga kluster nya nyengkaum pengawa dagang enggau ngelakuka produk menua tu, kluster adat enggau main asal, pemerindang sereta mantaika penau enggau pengelandik peranak ba kandang endur tu empu, enggau ketiga, kluster gastronomi komuniti ba endur tu empu enggau aktiviti rekreasyen.

Sama bisi datai, Sapit Menteri Pelajar, Inovasyen enggau Pemansang Penau Sarawak Datuk Francis Harden Hollis, Sapit Menteri Utiliti enggau Telekomunikasyen Sarawak Datuk Liwan Lagang, Sapit Menteri Industri Pemakai, Komoditi enggau Pemansang Wilayah Sarawak Datuk Martin Ben sereta temuai dipebasa ti bukai.

Advertisement