Anda di sini

Renggat keterubah projek KUTS deka berengkah dipejalaika lalu ditembuka ujung taun 2027

Advertisement
Gambar Sarawak Metro
Gambar Sarawak Metro

KUALA LUMPUR: Renggat keterubah projek Sistem Pengangkut Mengeri Kuching (KUTS), ti benung dipejalai enggau diaduka Sarawak Metro Sdn Bhd, anak kompeni dikeempu Perbadanan Pembangunan Ekonomi Sarawak (SEDC) deka berengkah dipejalai lalu ditembuka lebuh manggai ujung taun 2027.

Projek KUTS, ari baruh bidang kuasa Opis Menteri Pengangkut Sarawak enggau penyampau belanja dipelabaka RM6 bilion ari perintah nengeri deka ngurangka penyekut trafik seraya nyungkakka produktiviti enggau penumbuh ekonomi ti besai agi. 

Eksekutif Kanan Promosyen enggau Kaul Awam Sarawak Metro Muhammad Fahri Izzad Muhammad Yakup madahka Renggat 1 projek nya bisi tiga jalai transit tauka pengangkut iya nya Jalai Biru, Jalai Mirah enggau Jalai Gadung, ti mungkur penyauh 69.9 kilometer enggau 35 stesen.

Iya madahka renggat keterubah Jalai Biru ti berengkah ari Rembus ke Stutong deka tembu ujung taun baru, ditangkan renggat kedua berengkah ari Stutong ke Hikmah Exchange enggau Jalai Mirah (Kuching Sentral - Pending) ba taun 2026.

"Jalai Gadung  (Pending - Damai Central) deka berengkah dipejalaika serap ba taun 2027," ku iya madah ngagai BERNAMA maya baum Penyelesaian Rel Asia 2024 ditu, ensanus.

Kelimpah ari nya, Muhammad Fahri Izzad madahka Transit Aliran Autonomi (ART), tulang belakang projek KUTS deka berengkah dipejalaika ba jalai virtual ti diungkapka dikena ia aja enggau ngena sel elektrik hidrogen enggau pengelaju operasyen nyentuk 70 kilometer sejam.

"Lima unit ART keterubah deka datai ba bulan Oktober tu, enggau enti udah berengkah dipejalaika semua, kami deka bisi 38 unit ART," ku iya.

Penyelesaian Rel Asia 2024 nyendiaka kandang endur ti meruan alai berandau enggau peluang rengkayan ngagai lebih 600 operator kereta ari di rantau Asia.

Direktor, Penyelesaian Rel Asia Norman Johnston madahka pengawa pemandang enggau aum besai ti diatur tiap taun ti ke-23 nya diatur pengelama dua setengah hari enggau dipelaba matak 12,000 ngagai 15,000 iku orang datai.

"Kami mai tama raban operator kereta api ari menua bukai baka Bangladesh, Indonesia, Vietnam enggau Filipina.

"Sida ulih betemu enggau raban sekereja ari menua bukai sereta berandauka penanggul ti ditapi enggau mantu pangan diri kena ngiga chara mutarka," ku iya. -BERNAMA
 

Advertisement