KUCHING: Pengawa ngaga jematan meraka Sungai Kemena di Sebauh, Bintulu benung digaga enggau manah sereta dulu ari timpuh tembu ke udah ditetapka.
Sapit Premier, Datuk Amar Douglas Uggah ti ngabas taba lalu matau pemansang projek nya madah diri puas ati meda pemansang projek nya.
Ku iya jematan ti pemanjai 728.56 meter berega RM74,893,670 nya ditimpuhka tembu ujung bulan Disember, 2025.
Tang Menteri Infrastruktur enggau Pemansang Penyangkai Kapal nya ngarapka kontraktor Hartanah Construction and Development Senderian Berhad ulih nembuka nya dulu ari timpuh ti ditetapka.
"Aku deka ke tu tembu sebedau nyambut Krismas tauka dulu agi ari nya. Ngambika orang ditu enggau orang bukai ulih nengah tu maya musin pengerami," ku iya maya ngabas taba projek nya.
Uggah arap bendar projek nya ulih ditembuka tumu bepelasarka penyulut kontraktor naka ke diatu.
Kelimpah ari nya, ku iya, Sarawak dalam beberapa bulan ti deka datai, betapi enggau gaya hari ti kemarau.
"Aku ngarapka kontraktor, nadai penanggul pengereja pengawa tauka kereban ti patut ditapi, kena peluang gaya hari tu ngenyampatka pengawa ngaga (projek)," ku iya.
Projek nya kala nyadi projek sakit ti balat enggau pengawa nembuka tu udah ditangguh pengelama tiga taun.
Ku iya, perintah nadai pilih bukai kelimpah ari ngetuka kontraktor ke sebedau tu taja pan udah ngaga tauka nembuka urung 50.61 peratus .
Hartanah Construction and Development Sendirian Berhad, nyadi kontraktor penyelamat, nampung laluh kereja berengkah ba ujung bulan Disember taun nyin kemari.
Sida diberi timpuh 24 bulan alai nembu lalu nyerahka projek tu.
JKR Bintulu udah diberi tanggung pengawa matau pemansang projek nya.
Nyempulang iya ngabas projek nya Menteri Industri Pemakai, Komoditi enggau Pemansang Wilayah Dato Sri Dr Stephen Rundi Utom ti mega Kaban Kunsil nengeri (ADUN) Kemena enggau Direktor JKR nengeri Datu Richard Tajan.