Anda di sini

Gerempung Aktiviti Rampa Menua Kyoto, Jepun nemuai ke Kapit bekunsi penelaba pasal raban bansa baruh karbon

Advertisement
(Ari Kiba) Lating, Okubo, pemesai IRDA Daisy Harry, Kelimbik enggau Takahashi maya nemuai ke pasar tamu.
(Ari Kiba) Lating, Okubo, pemesai IRDA Daisy Harry, Kelimbik enggau Takahashi maya nemuai ke pasar tamu.

KAPIT: Bisi empat iku pemesai Gerempung Aktiviti Rampa Menua Kyoto, Jepun datai ditu kena Hari Tiga, nemuai dua hari lalu bekunsi peneleba sida enggau Majlis Daerah Kapit (MDK) pasal raban bansa baruh karbon.

Penemuai nya sebagi ari projek pemungkal Ejensi Kerejasama Antarabansa Jipun pasal pemansang raban bansa baruh karbon 

Walikota MDK Lating Minggang madahka mengeri Kyoto chukup maju ari sukut pelin nerima ubah iklim tauka gaya hari.

"Kyoto berengkah betaun ke udah, Malaysia berengkah ba taun 2019 enggau Kapit taun nyin kemari.

"Ba kami MDK, langgur tumu kami fokus ngagai pengawa nanam kayu enggau ngena baru," ku iya madah ngagai pengarang berita.

Lating madahka, taga sida deka nempa penyedar ba renggat sekula pasal pemesai guna raban bansa baruh karbon enggau mega nanam kayu ba Lily Pond.

"Kami mega nempa kerejasama enggau SMK Kapit 2 dalam projek gadung laban sekula tu bisi kandang endur ti besai," ku iya.

Raban ari Jipun nya nyengkaum Menijar Projek Nobuhiro Okubo, Sapit Menijar Projek Koichi Shiba dan Norihiko Ibuki, enggau Pemesai Projek Migiwa Takahashi.

Sama bisi ba penemuai nya, pemesai ari Majlis Bandaraya Johor Bahru (MBJB) enggau Autoriti Wilayah Kemajuan Iskandar (IRDA).

Ba Sarawak, MDK enggau Lembaga Kemajuan Bintulu udah dipilih ngambi bagi dalam projek pemungkal nya.

Di Semenanjung ke dipilih iya nya  MBJB enggau IRDA, sereta di Sabah, Majlis Perbandaran Tawau udah dipilih.

Maya nemuai nya, mensia mayuh ti datai ngulu sesi bekunsi ari Okubo di MDJ sebedau ti nemuai ke Rumah Richard Engking 40 pintu di Selirik, ‘tamu’ (pasar tani), palan kraf pengelandik jari enggau Lily Pond.

Ari Kapit, sida nuju ke Sibu sereta udah nya bekejang ke Johor Bahru nemuai ngagai MBJB enggau IRDA, sebedau pulai Jipun.

Kelimpah ari nya, sekretari MDK, Kelimbik Sibat madahka seduai iya Lating deka dibai nemuai ke Kyoto ujung taun tu lalu bejalaika pengawa pemansik bekaul enggau raban bansa baruh karbon din.
 

Advertisement