Anda di sini

Skim Duit Jali Rumah Panjai udah meri penguntung ngagai 1,081 rumah panjai kenyau ari taun 1978

Advertisement
Dr Sim ngayanka dokumen Opis Menteri Pengerai Mensia Mayuh, Pengawa Berumah enggau Perintah Lokal  ti dibantaika iya maya nyimpul jurai opis menteri nya, seraya disempulang sapit iya Datuk Dr Penguang Manggil (kiba) enggau Datuk Michael Tiang (kanan) ba Kompleks DUN ditu, kemari. -Gambar Chimon Upon
Dr Sim ngayanka dokumen Opis Menteri Pengerai Mensia Mayuh, Pengawa Berumah enggau Perintah Lokal ti dibantaika iya maya nyimpul jurai opis menteri nya, seraya disempulang sapit iya Datuk Dr Penguang Manggil (kiba) enggau Datuk Michael Tiang (kanan) ba Kompleks DUN ditu, kemari. -Gambar Chimon Upon

Dikarang Rengayan Labang 

KUCHING: Dalam timpuh 45 taun iya nya ari taun 1978 ngagai 2023, Skim Duit Jali Rumah Panjai udah nguntungka 1,081 rumah panjai ti mungkur  23,539 pintu bilik di serata nengeri tu.

Sapit Premier, Dato Sri Dr. Sim Kui Hian ti mega Menteri Pengerai Mensia Mayuh, Pengawa Berumah enggau Perintah Lokal madahka, nya udah begunaka ungkup belanja sepenyampau RM453.3 juta ti nyengkaum ari perintah besai RM250.96 juta enggau perintah Sarawak RM202.34 juta.

Ku iya, kenyau ari taun 2022, perintah Sarawak ninting taun ngungkupka RM50 juta dikena nambah enggau ngenyampatka transformasyen pengidup kandang endur menua pesisir enggau ngurangka lis peminta ba skim nya di serata nengeri tu.

“Nyentuk 2 Mei 2024, sepenyampau RM182.88 juta udah diagihka, ti nguntungka 289 rumah panjai ti mungkur 6,152 pintu bilik .

“Naka ke diatu, 55 rumah panjai ti mungkur 1,182 pintu bilik ti begunaka ungkup belanja RM52.6 juta udah dikemendarka enggau nganti dibayar.

“Lalu ke diatu mega bisi 187 rumah panjai ti mungkur 3,704 pintu bilik agi nganti lis,” ku iya lebuh ti nyimpul jurai Opis Menteri Pengerai Mensia Mayuh, Pengawa Berumah enggau Perintah Lokal maya baum DUN Sarawak ditu, kemari.

Ngenang Sarawak Rental Assistance Scheme (SRAS), iya madahka kediatu, SRAS Selection Committee udah ngemendarka 3,917 peminta enggau penyampau belanya RM21.8 juta.
Peminta ti dikemendarka nya nyengkaum 2,493 peminta baru ari penyuwa flat mensia mayuh enggau HDC, bisi 1,037 ngemaruka suwa ba taun kedua sereta 302 ngemaruka ba taun ketiga enggau 85 nembiak ari institusyen pelajar tinggi, ku iya.

“Ari 3,917 peminta tu bisi 2,701 peminta ari pelilih menua Kuching, 10 peminta ari Samarahan, 422 peminta ari Sibu, 109 peminta ari Miri enggau 590 peminta ari Bintulu.

“Ungkup nembiak, SRAS Selection Committee udah ngemendarka 85 peminta ari 127 peminta ke diterima. 

“Entara peminta ti dikemendar nyangkaum dua nembiak ari Universiti Malaysia Sarawak (UNIMAS), dua ari Swinburne University enggau 81 iku nembiak ari Technology College Sarawak (TCS),” ku iya.

Advertisement