SIBU: Bisi 18 iku abis belajar kelas Ajat Liuk Lundai ke tembu kena 30 Mac apin lama di Rumah Joseph Jarau, Tanjung Bekakap kena ngetanka adat enggau main asal bansa kitai Iban.
Program nya diatur Komiti Pemansang enggau Pengelikun Genturung Pendiau (JKKK) Rumah Joseph Jarau enggau Serakup Indu Dayak Sarawak (SIDS) Pampang Tanjung Bekakap.
Kelas nya ti diatur urung sebulan dipejalaika pengepun Studio Kajat Asas Iban Sibu, Valentine Bala tauka dikelala enggau nama'Sifu Pink'.
Chairman SIDS Tanjung Bekakap, Karmila Galau madahka sida iya udah lama ngelanggur deka ngatur kelas belajar ngajat tang semina baru ulih dipejalai pengudah betemu enggau 'Sifu Pink'.
"Udah ke betemu enggau iya, aku tebuka ati belajar ngajat sereta sama mai kelebih agi indu ba Rumah Joseph Jarau sama enggau belajar," terang iya.
Karmila mega beterima kasih ngagai pengajar ti ngajar iya sereta semua sida ke ngambi bagi ke tebal agi nadai pengelandik ngajat.
"Terima kasih ngagai Persatuan Kebajikan Masyarakat Iban Sibu @ Teresang Dayak Sarawak enggau Persatuan Kebajikan Masyarakat Terabai Menua Sarawak ti bisi meri pemeri kena bejalaika program nutup kelas nya," ku iya.
Pengari Teresang Dayak Sarawak Sibu, Natanael Sumping maya bejaku meri terima kasih ngagai 'Sifu Pink' ti deka bekunsi peneleba enggau pengelandik ngajat enggau orang mayuh.
Iya mega muji sida ke ngambi bagi ba kelas belajar Ajat Liuk Lundai ti chukup bebendar deka belajarka ajat nya, seraya ngetanka adat enggau main asal kelebih agi ajat.