Anda di sini

SUPP Bawang Assan temegah ati enggau geran RTP ngangkatmanah infrastruktur di Paradom

Advertisement
Lau (empat kanan) disempulang Marshall (lima kanan) enggau raban iya lebuh ti matau ngagai pekara bekaul infrastruktur di kandang menua ili Paradom di Sibu.
Lau (empat kanan) disempulang Marshall (lima kanan) enggau raban iya lebuh ti matau ngagai pekara bekaul infrastruktur di kandang menua ili Paradom di Sibu.

SIBU: Ketuai Raban Pemansang Komuiti Parti Sa'Ati Rayat Sarawak (SUPP) Pampang Bawang Assan Kunsilor Kevin Lau temegah ati enggau dana khas projek Program Transformasyen Menua Pesisir (RTP) dalam ngangkatka perengkaguna infrastruktur ba kandang endur ili Paradom.

Ku iya madah, agih belanja RM410,000 ari perintah Sarawak nengah Opis Kereja Raya (JKR) ditu deka dikena ngangkatmanah empat jematan kayu di Jalai Nang Chong.

Nitih ku iya agi, agih belanja eksklusif mega deka diberi ungkup pengawa ngangkatmanah rumah panjai din.

“Injinir JKR ditu enggau aku sebedau tu, udah ngelawa kandang menua nya lalu mansik guna pengawa ti deka diperambu,” ku iya nengah siti penerang kemari.

Lau madah, tu pengudah nya ditangkanka enggau pengawa nyuaka peminta betulis ngagai Premier Sarawak nengah Sapit iya Datuk Amar Dr Sim Kui Hian, ti mega Presiden SUPP.

Ku iya, pengawa ngangkatmanah tu deka meri pengelantang ngagai peranak di kandang menua tu laban empat jematan deka nyambung ngagai jalai siti aja ti ditengah sida.

Ku iya, agih belanja tu mega deka meri pemaik ngagai sebuah sekula enggau gerija di kandang menua tu.

“Aku endang beterima kasih ngagai Premier Sarawak Datuk Patinggi Tan Sri Abang Johari Tun Openg laban udah ngagihka dana khas RTP tu ungkup peranak di kandang menua ili,” ku iya nyemetak.

Lau madahka, iya enggau JKR kena Hari Enam nyin tadi udah ngelawa baru taba nya lalu deka mansik ngagai pengawa merambu pengawa tu.

“Aku beterima kasih ngagai raban JKR ditu ti udah bekerejasama rat enggau Raban Pemansang Komuniti SUPP Pampang Bawang Assan dalam nentuka pemaik peranak di Bawang Assan,” ku iya nambah.

Sama nyempulang iya dalam pengawa matau tu iya nya pengari JKR Sibu Marshall Minggu.

Advertisement