Anda di sini

Nadai monopoli dagang LPG di nengeri tu: Julaihi

Advertisement

Pengawa nyadung silinder LPG nya dipejalaika PETROSNiaga Sdn Bhd, kerejasama Petros enggau Petronas

Julaihi (dua kiba) begulai enggau Sapit Menteri iya Datuk Liwan Lagang (tiga kanan) enggau sida bukai ngayanka kelai jari manah ngagai pengawa ngisi gis LPG Petros ba IOT Senari ditu, kemari. - Gambar Voon Siang Pin
Julaihi (dua kiba) begulai enggau Sapit Menteri iya Datuk Liwan Lagang (tiga kanan) enggau sida bukai ngayanka kelai jari manah ngagai pengawa ngisi gis LPG Petros ba IOT Senari ditu, kemari. - Gambar Voon Siang Pin

"Nya kerejasama Petros (Petroleum Sarawak Berhad) iya nya kompeni nengeri enggau Petronas, sebuah kompeni minyak enggau gis menua. Nya ukai Petros aja”

Dato Sri Julaihi Narawi 
Menteri Utiliti enggau Telekomunikesyen


KUCHING: Mensia mayuh diberi jamin, nadai monopoli dagang gis petroleum cecair (LPG) di nengeri tu laban mayuh ti ngambi bagi ba pengawa ngagihka nya di serata Sarawak.

Menteri Utiliti enggau Telekomunikesyen Dato Sri Julaihi Narawi madah, pengawa nyadung silinder LPG ti dipejalaika PETROSNiaga Sdn Bhd iya nya kerejasama entara Petros enggau Petronas.

"Nya kerejasama Petros (Petroleum Sarawak Berhad) iya nya kompeni nengeri enggau Petronas, sebuah kompeni minyak enggau gis menua. Nya ukai Petros aja.

"Sida mega bekerejasama enggau Senari Energy enggau sida bukai tauka mayuh agi kompeni bukai nyadi ti raban ke bisi pemerat dalam nya.

"Nya enda ngayanka (pengawa dagang) monopoli baka ti dituduh sekeda orang," ku iya.

Iya madahka pekara nya maya aum pengarang berita pengudah ngabas pengawa ngisi LPG ba Independent Oil Terminal (IOT) Senari ditu, kemari.

Julaihi mega meri jamin ngagai mensia mayuh, PetrosNiaga ukai semina deka nyendiaka aspek pengelikun tang nyendiaka silinder LPG ti chukup dikena napi peminta.

Ku iya, sebulan PetrosNiaga ulih ngeluarka nyentuk 700,000 silinder LPG sebulan ungkup serata nengeri.

Nitihku iya, dianggar 16,000 silinder LPG sehari dikeluarka maya ngeluarka maya hari biasa lalu nya ulih manggai nyentuk 20,000 sehari enti sida gawa maya ujung minggu.

"Sida sedia nyendiaka silinder gis lebih ari chukup," ku iya seraya madah LPG besabsidi Petros agi ba rega RM26.60 tiap kali diisi baru.

Iya mega madahka bisi tim khas udah ditumbuh Petros kena matau pekara ti nyadi ba palan nya din sereta mansik sebarang isu ke nyadi.

Ku iya nya nyengkaum jaku tuduh ti dikerembai sebedau tu, iya nya bisi chaj tambah lebuh ke nukar silinder LPG ari kompeni bukai ngagai silinder Petros.

Bekaul enggau penemuai nya, Julaihi madahka nya ambika iya meda kediri empu kereja ti dipejalaika Senari Energi nengah terminal IOT ke alai sida bejalaika kereja ngisi baru gis ke dalam silinder Petros.

"Sida udah sedia nentuka gis LPG besabsidi chukup dikena napi peminta mensia mayuh," terang iya.

Kelimpah ari nya dalam penerang PetroNiaga ti disadung PetrosNiaga ngagai media, Petros nengah pampang LPG sida iya, PetrosNiaga deka nyadi pemekal tunggal silinder besabsidi di Sarawak.

Silinder LPG ungkup ruang bilik 14kg ulih dibeli nengah rengkayan besai PetrosNiaga ti bisi 65 penyadung LPG Petros di serata Sarawak.

PetrosNiaga mega meri jamin ngagai mensia mayuh, nadai chaj tambah enti sida betukar ari silinder LPG bukai ngagai silinder LPG Petros (chura mirah) tauka Petronas (gadung).

Advertisement