Anda di sini

Pinta projek pemansang betanam betupi ti bisi disediaka nengah JPS

Advertisement
Dominic (kiba) enggau Martin (kanan) nyempulang Dr. Abdul Rahman nyuaka skorl ngagai siku ari graduate IPS, kemari. - Gambar Chimon Upon
Dominic (kiba) enggau Martin (kanan) nyempulang Dr. Abdul Rahman nyuaka skrol ngagai siku ari graduate IPS, kemari. - Gambar Chimon Upon


Dikarang Rengenyan Labang 

KUCHING: Orang dagang tani betanam betupi kelebih agi raban graduate ke ngambi bidang dagang dalam betanam betupi tau minta projek pemansang betanam betupi ti bisi disediaka nengah Opis Betanam Betupi Sarawak (JPS).

Direktor JPS Dominic Chunggat madah, berindik ari nya meransang kelebih agi graduate orang dagang ari Institut Betanam Betupi Sarawak (IPS) ngerebut peluang enggau projek pemansang ke bisi disediaka JPS.

Iya ngarapka nengah projek pemansang ke bisi disediaka nya ulih nyadika peransang tauka matak mayuh agi graduate orang dagang IPS laban ari penyampau semua 1,931 iku graduate ari IPS kenyau ari taun 1985 ngagai 2022, peratus graduate orang dagang agi mimit.

"Peratus graduate orang dagang (ari IPS) agi kelalu mimit iya nya tiga peratus. Nya alai, aku minta raban graduate ti bisi juluk ati deka nyadi orang dagang Betanam Betupi, patut berengkah ari diatu ngemansangka tanah diri sebilik lalu udah nya minta bantu projek pemansang betanam betupi ti bekaul, kena ngemesaika pengawa dagang kita.

"Penerang bekaul enggau projek pemansang betanam betupi nyengkaum bidang betanam, akuakultur, betupi enggau industri asas tani tau ditanya ba Opis Betenam Betupi Pelilih Menua tauka Opis Veterinar Pelilih Menua ba menua diri empu.

"Kita (raban graduate) ti ngambi bagi dalam pengawa dagang betanam betupi ukai semina ngasilka penatai pemisi, tang kita ulih nyaup ngagai pengawa ngeluarka enggau nyamin pemakai menua," ku iya.

Iya madahka pekara nya dalam jaku pengerami Konvokesyen ke-18 IPS, JPS ti dipenyadi Sapit Menteri Industri Pemakai, Komoditi enggau Pemansang Wilayah Sarawak Datuk Dr. Abdul Rahman Ismail, ke diatur ba Palan Konvensyen Penview ditu, kemari.

Bekaul enggau konvokesyen nya, Dominic madahka bisi 86 iku graduate udah tembu belajar ba tikas Program Sijil Pertanian enggau 24 iku graduate Sijil Kemahiran Malaysia ba IPS.

Ku iya, ditambah enggau penyampau nya, bisi 1,931 iku graduate udah diadaka IPS kenyau ari taun 1985.

"Ari 86 iku graduate tu bisi nyengkaum 25 iku ngambi Pengkhususan Teknologi Pengeluaran Tanaman Makanan; Pengkhususan Pengurusan Estet (25); Pengkhususan Pengurusan Ternakan (25) enggau 11 iku ngambi  Pengkhususan Landskap. Semua sida tu bisi diberi latih industri berengkah 31 Julai ngagai 23 September 2023 ba 32 bengkah pengaji ti nyengkaum sebuah ejensi perintah, empatopis bekaul perintah enggau 27 kompeni peribit.

"Baka ti dipadah ngagai aku, bisi 26 iku granduate tu udah diambi gawa, lalu ari penyampau nya bisi 13 iku gawa dalam bidang agro," ku iya.

Berebak enggau tu, iya madahka kenyau ari taun 1985 nyentuk 2022 penau bulih kereja graduate Program Sijil Pertanian udah maggai 87 peratus, lalu nya indikesyen positif graduate IPS diterima dalam industri betanam betupi.

Iya madah, ari peratus nya (87 peratus) bisi 58 peratus gawa enggau perintah, lima peratus gawa enggau opis bekaul perintah, 20 peratus gawa enggau kompeni peribit lalu tiga peratus nyadi orang dagang.

Ari sukut sektor ku iya, bisi 89 peratus udah gawa dalam sektor betanam betupi enggau 10 peratus gawa dalam sektor ukai betanam betupi baka sektor pengelikun, perubat, pelajar enggau ke bukai.

"Ari penyampau semua nya, udah ngayanka pengasi bejalaika Program Sijil Pertanian Sarawak kenyau ari taun 1985 nyentuk ke diatu lalu aku ngarapka peratus penau bulih kereja graduate terus nambah ba taun ke deka datai," ku iya.

Sama ngulu pengerami nya, Sapit Menteri Industri Pemakai, Komoditi enggau Pemansang Wilayah Sarawak Datuk Martin Ben enggau sida ke bukai.

Advertisement