Anda di sini

Penyerakup bansa nempa pemereti ati enggau pengelikun, ku Mong

Advertisement
Mong (tengah) enggau bala bukai melah kek kelai  bejadi Pengerami Merarau Saint Mark Chapel Punggu Hari Enam minggu nyin tadi.
Mong (tengah) enggau bala bukai melah kek kelai  bejadi Pengerami Merarau Saint Mark Chapel Punggu Hari Enam minggu nyin tadi.

SRI AMAN: Penyerakup bansa ti udah dikemeranka ngelama tu patut diteruska kena nempa pemereti ati enggau pengelikun  belama ba pupu bansa di negeri enggau menua tu.

Kban Kunsil Negeri Bukit Begunan Datuk Mong Dagang madah, penyerakup bansa nya isu ti beguna amat sereta patut dikemeratka laban nya pekara ke beguna kena nempa sebuah menua ke tegap ukai semina ari sukut sosial tang mega ekonomi enggau politik.

Ku iya, numbuhka sesebuah menua merdeka sereta tegap ukai pengawa mudah kelebih agi ba negeri enggau menua tu ti ngembuan bemacham pupu bansa enggau jalai pengarap ti tentu ngembuan bemacham ulah.  

"Nya kebuah kitai mesti beratka ulah bebatak asur sereta nempa tanggam kaul ti rat enggau raban bansa bukai ambika penyerakup nya semampai idup di menua tu," ku iya.

Iya bejaku munyi nya lebuh bejadi Pengerami Merarau ti diatur Saint Mark Chapel Punggu ditu, Hari Enam Minggu nyin tadi.

"Kelimpah ari nya, kitai ditu amat benasit laban bisi bala ketuai sekalika ba renggat kaban rama, negeri tauka perintah besai ti pintar ngasilka idea sereta nimpai jauh kena nyamin penegap di negeri tu," ku iya.

Ku iya baru, penyerakup ke baka tu nyata dipeda ari pengawa enggau penau ketuai enggau rayat pupu bansa udah sama ngenanka  pengelikun.

Ku Mong, pelajar siti ari kelai pemujur kena nentuka kualiti idup mensia lalu patut dikemeratka nyadi pekara ke mesti setipak enggau ajar jalai pengarap.

Ku iya, pelajar ukai semina meri pemandai akademik, tang meransang pemansang moral enggau jalai pengarap setipak enggau ajar ti manah ba  jalai pengarap.  

“Tuju chara tu endang kena nentuka individu nya ukai semina pintar sechara intelektual tang mega bisi tanggung pengawa sechara moral enggau etika nitihka ajar jalai pengarap ke dipegai sida. 

"Aku mega ngaku beratka pelajar endang dikena ngenegapka pelasar pemansang individu enggau semua raban bansa," ku iya.

Ba pengeami nya, Mong bisi ngungkupka Projek Transformesyen Menua Pesisir (RTP) RM300,000 dikena ngaga rumah paderi ba All Saint's Gua ti deka  berengkah digaga enda lama agi. 

Iya mega bisi ngungkupka RM200,000 dikena ngaga dewan Parish besemak enggau Saint Mark Chapel, ditangkanka enggau RM150,000 dikena ngemanahka agi begunan lama All Saint's Gua ngagai dewan Parish nyengkaum agih belanja RM10,000 ungkup Saint Mark Chapel.

Sama bisi ngulu pengerami nya, Father Afron Gori ari Gerija Saint Luke Sri Aman enggau bala bukai.

Advertisement