Anda di sini

Dr Rundi: Pelajarka teknologi kena napi peminta industri dalam jeman digital

Advertisement

Raban graduate ngembuan tanggungpengawa sama mai transformesyen, ngemodenka sektor betanam betupi

r. Abdul Rahman datai seraya bejadi pengerami Konvokesyen ke-18 IPS, Opis Betanam Betupi Sarawak (JPS), kemari. - Gambar Chimon Upon
Dr. Abdul Rahman datai seraya bejadi pengerami Konvokesyen ke-18 IPS, JPS, kemari. - Gambar Chimon Upon

"Kitai diatu nyauka nyingkang ngagai Revolusyen Industri 4.0 (IR 4.0). Nya alai aku meransang tauka minta raban graduate ambika enda tinggal ari belajarka penemu enggau pengelandik ti bekaul enggau teknologi baka 'digital marketing', robotik enggau analisa data”

Dato Sri Dr. Stephen Rundi Utom 
Menteri Industri Pemakai, Komoditi enggau Pemansang Wilayah Sarawak


Dikarang Rengenyan Labang 

KUCHING: Raban graduate diperansang belajarka penemu enggau pengelandik bekaul enggau teknologi dikena nyikap diri nyadi mensia ke ulih besemekih kena napi peminta industri dalam jeman digital.

Menteri Industri Pemakai, Komoditi enggau Pemansang Wilayah Sarawak Dato Sri Dr. Stephen Rundi Utom madah, laban raban graduate nyengkaum ke tembu belajar ba Institut Betanam Betupi Sarawak (IPS) ngembuan tanggungpengawa sama mai transformesyen enggau ngemodenka sektor betanam betupi.

"Kitai diatu nyauka nyingkang ngagai Revolusyen Industri 4.0 (IR 4.0). Nya alai aku meransang tauka minta raban graduate ambika enda tinggal ari belajarka penemu enggau pengelandik ti bekaul enggau teknologi baka 'digital marketing', robotik enggau analisa data.

"Penemu enggau pengelandik tu ulih nempa kita nyadi mensia ti ulih besemekih kena napi peminta guna industri dalam jeman digital diatu.

"Raban graduate mega sama bisi tanggungpengawa dalam mai transformesyen enggau ngemodenka sektor betanam betupi negah chara gawa dalam bidang betanam betupi sekalika gawa makai gaji tauka nyadi orang dagang betanam betupi (usahawan tani)," ku iya.

Dr. Rundi madahka pekara nya dalam teks jaku iya ti dibacha Sapit Menteri iya, Datuk Dr. Abdul Rahman Ismail, ti ngarika iya bejadi pengerami Konvokesyen ke-18 IPS, Opis Betanam Betupi Sarawak (JPS) ke diatur ba Palan Konvensyen Penview (PCC) ditu, kemari.

Bejaku baru, Dr. Rundi madahka tanggungpengawa ngenukuka penyukup pemakai ukai semina dilempai ka ba opis menteri aja.

Tang, ku iya, begunaka saup ari semua orang kena nentuka penyukup pemakai enggau jamin pemakai menua kelebih agi Nengeri Sarawak.

"Diatu Sarawak ngemeratka pemansang industri padi enggau berau kena ngulihka juluk tahap Sara Diri (SSL) 60 peratus lebuh manggai taun 2030.

"Kelimpah ari nya, diatu Sarawak komited dalam pemansang sektor betanam betupi kena ngasilka penatai pemisi eksport setipak enggau aspiresyen juluk Sarawak nyadi pengeksport beresi pemakai lebuh manggai ba taun 2030.

"Pemar ti ditapi nya muka peluang ti lebih besai ngagai raban graduate ngambi bagi dalam bidang betanam betupi. Peluang udah bisi ba mua sereta bepanggai ba penyikar  kita (raban graduate) tauka engkerendut dada dalam zon ti lantang," ku iya seraya meri tabi puji enggau pengaga ati ngagai semua raban graduate IPS ti graduate nya.

Sama bisi ngulu pengerami tu Sapit Menteri Industri Pemakai, Komoditi enggau Pemansang Wilayah Sarawak, Datuk Martin Ben; Direktor JPS Dominic Chunggat enggau sida kebukai.

Advertisement