Anda di sini

RM799.521 juta diungkupka ngagai MIPD  

Advertisement
Uggah nyimpul jurai MIPD maya Aum DUN Sarawak, kemari. - Gambar Roystein Emmor
Uggah nyimpul jurai MIPD maya Aum DUN Sarawak, kemari. - Gambar Roystein Emmor

KUCHING: Opis Menteri Infrastruktur enggau Pemansang Penyangkai Kapal (MIPD) diungkupka bajet pemansang 2024 sepenyampau RM799.521 juta.

Sapit Premier Sarawak, Datuk Amar Douglas Uggah Embas ti mega menteri di MIPD madahka ungkup belanja nya ulih dikena opis menteri bejalaika empat program infrastruktur.

Iya madahka entara empat program infrastruktur tu nyengkaum RM441.755 juta ungkup infrastrutur tanah; infratruktur sungai (RM82.781 juta); ungkup begunan perintah (RM259.600 juta) enggau RM15.385 juta ungkup begunan perintah.

"Beranakka puku ba infrastrutur tu ngayanka komitmen perintah Sarawak ngangkatka pemansang ekonomi enggau servis perintah kitai. Kami tetap komited nempa kerejasama enggau semua ejensi perintah bejalaika program infrastruktur tu enggau efisyen sereta e,mpas manah ti nguntungka rayat.

"Pemansang infrastruktur iya nya puku ke beguna dikena ngemajuka sosial enggau ekonomi kelebih agi ba kandang menua pesisir. Tu ngenegapka chara pemun perintah Sarawak enggau ngasilka ekonomi ti ngerembai ke pengelantang rayat kitai. 

"Puku tu ngayanka komitmen nadai bebagi perintah Gabungan Parti Sarawak (GPS) ngangkatka 'liveability' enggau mobiliti peranak menua pesisir," ku iya lebuh nyimpul jurai ungkup MIPD maya Aum Kunsil Nengeri (DUN) Sarawak, kemari.

Bejaku baru iya madahka MIPD nengah JKR Sarawak udah diberi tanggungpengawa bejalaika 592 projek ti dipelanja perintah nengeri sepenyampau RM20.66 bilion ari baruh Atur Pemansang Malaysia Lumpar ke-12 (RMK12).

Ari penyampau nya, 107 projek beungkus sepenyampau RM1.90 bilion udah tembu, 117 projek beungkus RM12.15 bilion benung digaga, lalu laluh 368 projek berungkus RM6.61 bilion ba renggat pra-kunterik,

"Bisi 67 ari 592 projek baru dikemendarka ari baruh Pansik Setengah Penggal RMK12. Projek nya nyengkaum 25 jalai baru enggau jalai ti dikemanahka sepenyampau RM3.2 bilion; 20 Projek Rayat (RM2.6 bilion); 11 jalai penyambung menua pesisir (RM1.1 bilion); enam jematan (RM39.0 juta); sebuah pengkalan enggau tiga penyangkai kapal (RM37.8 juta); enggau sebuah begunan perintah ti berega RM2.0 juta," ku iya.

Nambahka nya bekaul enggau jalai tebing tasik, iya madahka bisi 13 pakej jalai enggau jematan baru, enggau 29 pakej kereja mulaika pemanah RM5.42 bilion ti ditetapka dikena nyendiaka akses ti meruan agi enggau penyambung ti lanchar ba sepemanjai kandang endur tebing tasik Sarawak.

Nyentuk ke diatu ku iya, semua 13 pakej jalai enggau jematan baru benung digaga sereta dipelabaka tembu entara suku ke-2 taun 2024 nyentuk ke suku ke-3 taun 2026.

Pakej kereja mulaika pemanahku iya, 17 ari 29 udah tembu enti dibandingka enggau 11 pakej ti diripotka dalam aum DUN sebedau tu.

"Enam pakej tambah ti udah tembu iya nya Lundu/Sempadi/Selang (7.6km) berega RM11.0 juta; Tebing Tasik Triso/Meludam/Pusa (9.1km) (RM13.0 juta); Pusa/Sesang Seksyen 1 (17.8 km) (RM14.4 juta); Sungai Nai/Tanjung Gelang (12.7km) (RM25.1 juta); Matu-Igan (12.9km) (RM21.0 juta); enggau Tanjong Kidurong/Kuala Suai/Kuala Niah/Kuala Sibuti/ Bakam (12.3km) ti beungkus RM9.8 juta," ku iya.

Kelimpah ari nya, iya madahka bisi 20 projek Jalai Besai Kedua (STR) ti sepenyampau RM5.58 bilion, sereta bisi 12 projek benung dipejalaika dalam beberapa renggat baka Jematan Baru Batang Samarahan nyengkaum Jalai Dua Lurung 9km; Batang Samarahan - Batang Sadong (13km) Jalai Dua Lurung; Jalai Batang Sadong -Batang Lupar/Sebuyau; Jematan Batang Saribas No.2; Batang Saribas ke Jalai Roban (Simpang);

Nambah nya, Jalai Sebuyau - Lingga; Jematan Sungai Lingga; Jalai nyambung ngenyemakka Jematan Sungai Lingga ke Jalai Lingga ke endang udah bisi - Sri Aman; ngemanahka jalai besai ke udah bisi ba pasar Sri Aman; Jematan Batang Lupar No.2; Jalai Batang Lupar ke Betong (Simpang); enggau Jalai Penyambung Ulu Paku/Ulu Kota enggau ngemanahka agi Jalai Ulu Paku ke udah bisi (Jalai Betong - Pakan).

"Semua 12 projek tu ditimpuhka tembu pemadu tumu ba suku ke-3 taun2024 nyentuk suku ke-2 taun 2028.

"Laluh lapan projek ba tikas mayuh bengkah renggat pra-kunterik iya nya empat benung dalam renggat dilangkar; tiga ari baruh dokumentesyen tinda enggau siti ba renggat tinda. 

"Semua projek tu dipelaba deka berengkah digaga lebuh manggai ba taun 2024," ku iya.
 

  • oleh
  • Advertisement