Anda di sini

Lima taman industri, sebuah Anjung Usahawan tembu digaga dalam taun 2023

Advertisement
Awang Tengah mandangka dua dokumen simpul jurai opis menteri ke dipegai iya nyengkaum Opis Menteri Dagang Antarabansa, Industri enggau Beranakka Puku ti dipejuraika iya maya baum DUN Sarawak, kemari. -Gambar Chimon Upon
Awang Tengah mandangka dua dokumen simpul jurai opis menteri ke dipegai iya nyengkaum Opis Menteri Dagang Antarabansa, Industri enggau Beranakka Puku ti dipejuraika iya maya baum DUN Sarawak, kemari. -Gambar Chimon Upon

KUCHING: Sapit Premier Sarawak, Datuk Amar Awang Tengah Ali Hasan madah bisi lima taman industri enggau sebuah Anjung Usahawan udah tembu digaga dalam taun 2023.

Menteri Dagang Antarabansa, Industri enggau Beranakka Puku nya madah, nya nyengkaum Kandang Industri Sematan Fasa 1; Kandang Industri Sri Aman; Kandang Industri Kapit; Kluster PKS Samalaju Fasa 1 enggau 2; enggau Anjung Usahawan Gedong.

Nitihku iya, bisi 41 projek agi dalam renggat dipejalai baka benung digaga, tinda, ngelangkar, ngambi tanah, nyiri penyading penemu tauka peminta palan pengentap baru.

"Pemansang industri ti betul enggau bisi atur, kelebih agi nengah ngelumuka industri ba kandang endur ti ditetapka deka numbuhka sinergi enggau mai empas positif ti meri penguntung ngagai pemansang ekonomi Sarawak.

"Ambika chunto, industri beteknologi tinggi di Sama Jaya enggau industri intensif energi di Samalaju ngena chara kolektif nyendika lebih ari 23,000 peluang kereja ngagai peranak ba menua nya ambika ngisi tebal agi kereja puang; mayar gaji tiap taun RM1.3 bilion; meri RM6.3 bilion ngagai ekonomi ba endur nya enggau nyual tauka eksport lebih RM27 bilion produk ti dikeluarka nengeri tu.

"Setipak enggau PCDS 2030, opis menteri aku komited nentuka kandang endur ti kondusif ngagai sida pengemeran industri enggau komuniti dagang kitai ngerembai maju," ku iya.

Iya madahka pekara nya lebuh ti nyimpul jurai Opis Menteri Dagang Antarabansa, Industri enggau Beranakka Puku maya baum Kunsil Nengeri (DUN) Sarawak ditu, kemari.

"Kami deka ngenyakahka agi pengeran kami ngangkatka tikas infrastruktur industri, ngangkat enggau ngenegapka kapasiti enggau pengulih PKS, matak pemeranak puku bekualiti, sereta ngerembaika dagang antarabansa kitai awakka ulih ngagaika ekonomi ti belimpah, nyengkaum sosial enggau rampa menua ti meruan," ku iya.

Bejaku baru, lebuh ti ngenang Opis Dagang enggau Dagang Temuai Sarawak Singapura (STATOS) ti ditumbuhka dalam taun 2019 ti nyadi fasilitator dagang, beranakka puku enggau dagang temuai, iya madahka STATOS ditumbuh enggau tuju kena nyambungka Sarawak ngagai makit dunya nengah Singapura.

Iya madahka STATOS kena nyambungka dagang Sarawak ke makit Singapura bekaul enggau pemakai sereta ngelakuka aktiviti dagang temuai, nyengkaum ngatur webinar, masuk Pengawa Pemandang Dagang Singapura enggau meri kelala program Duta Sarawak sereta Skim Bantu Promosyen.

"Nyentuk ke diatu, aktiviti udah mujur ngasilka lebih ari RM70 juta eksport, enggau lebih ari 35 pemekal nengeri tu nyual produk enggau servis sida ngena chara global nengah Singapura nyengkaum 19 orang dagang Sarawak ti disukung ari baruh Skim Bantu Promosyen ti disediaka STATOS.

"Kelimpah ari nya, aktiviti tu matak tiga kompeni korperat Singapura kena ngatur 'retreat' enggau pengerami dagang di Sarawak, ti mungkur lebih 400 penyereta.

"Ari sukut beranakka puku, sebuah kompeni Singapura benung berunding beranakka puku urung RM45 juta dalam projek ngaga solar melepung," ku iya.

Sedar ke tanggungpengawa enggau pengawa ke beguna STATOS ba rantau tu, ku iya, STATOS udah ditumbuhka di Brunei Darussalam sereta dipelaba berengkah bejalaika operesyen lebuh manggai ba taun 2024.

"Kami mega merambu dena numbuhka sebuah opis ti sebaka di Kalimatan, Barat.

"Dikena nentuka semua inisiatif enggau pengeran tu meri empas, opis menteri aku deka ngemansangka Polisi Pemeranak Puku Sarawak enggau juluk nyendiaka strategi promosyen beranakka puku ti komprehensif, nyengkaum ngelangkar insentif beranakka puku ti ditusun enggau ditaga kena matak pemeranak puku domestik enggau antarabansa.
 

  • oleh
  • Advertisement