Anda di sini

Inisiatif ngemansang mengeri baru, pasar mit baru enggau palan servis dikena ngurangka bida ekonomi 

Advertisement
Awang Tengah disempulang sapit menteri iya, Datuk Len Talif Salleh beratika dokumen simpul jurai MUDeNR sebedau nyimpul jurai maya aum DUN, kemari. -Gambar Chimon Upon
Awang Tengah disempulang sapit menteri iya, Datuk Len Talif Salleh beratika dokumen simpul jurai MUDeNR sebedau nyimpul jurai maya aum DUN, kemari. -Gambar Chimon Upon

KUCHING: Perintah Sarawak bejalaika inisiatif ngemansangka mengeri baru, pasar mit baru enggau palan servis dikena ngurangka bida ekonomi entara kandang mengeri enggau menua pesisir.

Sapit Premier Sarawak, Datuk Amar Awang Tengah Ali Hassan madah, nya sebengkah ari chara dikena nentuka pemansang ba kandang menua pesisir mega dikeibuhka.

“Berindik ari pekara nya, Perintah Sarawak nengah Lembaga Pembangunan dan Lindungan Tanah (LCDA) dalam Atur Pemansang Malaysia Lumpar ke-12 (RMK12) deka neruska sekeda projek ba mayuh renggat dilanggur enggau dipejalaika.

“(Entara projek iya nya) Pasar Baru Sebuyau, Samarahan; Pasar Baru Simunjan, Samarahan;Pasar Baru Daro Fasa II, Mukah; Pasar Mit Baru Kabong, Betong; Palan Servis Lingga, Sri Aman; Palan Servis Matu, Mukah; Palan Servis Igan, Mukah; Palan Servis Matadeng, Mukah; enggau Palan Servis Ulu Merapok, Lawas.

“Perintah Sarawak nengah LCDA deka neruska pengawa nyendiaka infrastruktur enggau ngaga komponen bukai ba rumah, pasar tamu, kedai ti ulih dibeli enggau industri kotej dalam pemansang mengeri baru enggau palan servis tu nitihka skop ti dikemandar dalam RMK12 ti dianggar beungkus RM207 juta,” ku iya.

Menteri Pengeraja Asal enggau Pemansang Mengeri Kedua nya mantaika pekara nya lebuh ti nyimpul jurai Opis Menteri Pengeraja Asal enggau Pemansang Mengeri (MUDeNR) maya baum Kunsil Nengeri (DUN) Sarawak, kemari.

Bejaku baru iya madah, seriris enggau juluk perintah ti deka napi peminta tinggi rayat meli rumah ngena rega ti patut, LCDA mega chakah ngaga rumah ti ulih dibeli ngena chara Industrial Buiding System (IBS).

“Kilang IBS digaga begulai entara LCDA enggau CRT Technology Sdn Bhd deka berengkah bejalaika operesyen dalam bulan Disember 2023 tu dikena nyukung pengeran perintah nyendiaka rumah alai diau ti chukup ngagai rayat Sarawak,” ku iya.

Kelimpah ari nya, iya madahka perintah nengeri nengah Opis Kampung Sarawak (JHS) enggau Sarawak Forestry Corporation (SFC) udah bejalaika mayuh bengkah inisiatif dikena ngangkatka sosioekonomi komuniti ti diau semak enggau Kampung Simpan Mendam (PFE) enggau Kandang Endur Ti Jaga Penuh (TPA)

Entara projek enggau program ti udah dipejalaika baka ngaga sistem nyendiaka ai graviti ba Long Kerong, Baram enggau Rumah Manggat Batang Ai; ngaga tujuh iti andau ba sekeda endur di Sri Aman, Baram, Limbang enggau Lawas; nyendiaka kereban atap rumah ungkup Komiti Segah Selaan Ulu Baram (Long Murung, Long Lamam enggau Ba’Sabateu);

Nambahka nya, ngemansangka sistem tagang kampung ba 15 palan ti dipilih; projek nupi ikan sangkar ungkup komuniti Rh Manggat enggau Rh. George, Batang Ai, Sri Aman; ngatur ekspo asil kampung ukai kayu (NTFP) enggau Beyond Timber Carnival (BTC) tiap taun; enggau ngatur kus tukang kayu, ngaga kereban rumah, miki injin sepit ngaga bo fiber enggau kus nyambung wayar elekterik sereta kus 'Lanjutan Kraf Kreativiti' NTFP ungkup komuniti ba mayuh bengkah endur ba selampur Sarawak.

“Projek enggau program ti dipejalaika tu ulih ngangkatka penatai pemisi sereta nyendiaka perengkaguna mensia mayuh ngagai peranak ti diatu semak TPA enggau PFE setipak enggau aspiresyen PCDS 2030.

“Sereta dalam timpuh ti sama deka meri empas positif ngagai pengawa nyaga pengeraja asal biologi di Sarawak,” ku iya.

Dulu ari nya, iya madahka bisi 67 TPA udah digazet sereta dijaga SFC lalu penyampau semua kandang endur pemesai urung 2.12 juta hektar, lalu pemesai TPA tu nyengkaum kandang endur marin ti pemesai urung 1.24 juta hektar enggau darat pemesai urung 872 ribu hektar.

“Perintah Sarawak naga kandang endur darat pemesai satu (1) juta hektar nyadi TPA lebuh manggai 2025.’

“Pengeran dipejalaika perintah Sarawak nengah SFC udah netapka lima iti agi kandang endur darat digazet nyadi TPA nyengkaum Taman Negara Tutoh-Apoh; Rizab Semulajadi Bukit Lima (Extension 1); Taman Negara Kubah (Extension 1); Rizab Semulajadi Matang; enggau Taman Negara Bako Buntal Bay.

“Semua kandang endur tu udah ba renggat digazet tumu sereta dipelaba deka nambahka pemesai kandang endur darat ti deka digazet nyadi TPA,” ku iya
 

  • oleh
  • Advertisement