Anda di sini

Dan tingkar ungkup pengereja pengawa opis Perintah Sarawak

Advertisement

Bisi 28,000 iku pengereja pengawa perintah deka dibayar BKK dua bulan batang gaji ti deka dibayar sebedau ujung taun tu 

Abang Johari datai nyimpul jurai maya Aum DUN Sarawak, seraya penatai iya dianti kaban kunsil nengeri ke bukai. - Gambar Opis Pemadah
Abang Johari datai nyimpul jurai maya Aum DUN Sarawak, seraya penatai iya dianti kaban kunsil nengeri ke bukai. - Gambar Opis Pemadah

"Bantuan Kewangan Khas tu deka dibayar sebedau ujung taun 2023. Dipelabaka urung 28,000 iku raban orang gawa ba opis perintah Sarawak nya deka nerima Bantuan Khas Kewangan ti begunaka anggar belanja enggau implikesyen belanja sepenyampau RM172 juta”

Datuk Patinggi Tan Sri Abang Johari Tun Openg 
Premier Sarawak

Dikarang Rengenyan Labang 

KUCHING: Urung 28,000 raban orang gawa opis perintah nengeri Sarawak deka nerima Bantuan Khas Kewangan (BKK) dua bulan batang gaji sida.

Premier Sarawak, Datuk Patinggi Tan Sri Abang Johari Tun Openg madahka BKK nya diberi kelai meri terima kasih perintah nengeri ngagai orang gawa opis perintah Sarawak ti bejalaika tanggungpengawa ke pengelantang rayat.

Iya madahka BKK dua bulan batang gaji nya deka dibayar ngagai semua raban orang ti gawa ba opis perintah Sarawak nyengkaum Opis Bekaul Perintah Sarawak enggau Opis Bekuasa Kandang Menua.

"Bantuan Kewangan Khas tu deka dibayar sebedau ujung taun 2023. Dipelabaka urung 28,000 iku raban orang gawa ba opis perintah Sarawak nya deka nerima Bantuan Khas Kewangan ti begunaka anggar belanja enggau implikesyen belanja sepenyampau RM172 juta.

"Kitai mega ingatka raban orang ti gawa ba opis perintah besai ti udah sama besaup sereta nyukung pemansang sosioekonomi Sarawak sepemanjai taun tu.

"Enggau tu akau deka madah Bantuan Khas Kewangan sepenyampau RM600 mega diberi ngagai semua raban orang ti gawa ba opis perintah besai ti gawa di Sarawak sepemanjai taun 2023 tu. Sida tu urung 130,000 iku ti gawa ba opis perintah besai nyengkaum Gerempung Berunifom, Raban Penyaga Pengelikun enggau Opis Bekaul Perinh,  Perintah Besai. Tu dipelabaka meri anggar implikesyen belanja sepenyampau RM78 juta sereta deka dibayar pun taun baru," ku iya.

Abang Johari ti mega Menteri Pekara Wang enggau Ekonomi Baru madahka pekara nya lebuh ti nyimpul jurai Aum Kunsil Nengeri (DUN) Sarawak ditu, kemari.

Iya madahka bantu belanja nya diberi berindik ari Sarawak udah ngasaika mayuh pemujur sepemanjai taun 2023 ketegal pengeran enggau komitmen semua orang.

Nyadi rayat Sarawak ku iya, kitai patut terus nempa penegap runding deka beserakup, ulih berundingka pangan diri, besaup enggau bebendar nyapai juluk nyadi kuasa ekonomi ti nyulut lebuh manggai taun 2030.

"Semina pengeran sama ngereja enggau penyerakup ba kitai semua ulih ngenatika pemansang ke pengelantang rayat enggau nyaga rebak dudi jemah ila," ku iya.

Berebak enggau tu, Abang Johari ti mega Menteri Pengeraja Asal enggau Pemansang Mengeri madah, maya bejadi Global Muslim Business Forum 2023 di BCCK, Menteri Besai udah ngaku sukung Perintah GPS ba pengawa nempa politik Malaysia ti tegap.

Iya madahka GPS udah meri 2/3 majoriti sitak Parlimen dalam perintah penyerakup, ti ngenegapka penuduk perintah penyerakup nempa Malaysia ti tegap, maju enggau lantang.

Ku iya, tu mega ulih meri pengarap ngagai raban pemeranak puku terus nyukung pemansang ekonomi menua.

"Nya alai, aku minta semua kaban komponen parti GPS sama ngemeratka penyerakup enda ngira parti enggau individu.

"Aram kitai nyeliahka pekara ti semina nguntungka diri enggau parti sereta nempa runding penyerakup lalu kerejasama nyadi siti  tim awakka terus tegap nyadi sebuah parti serakup ba penuduk atas di Malaysia.

"Ba timpuh ti sama, tu meri peluang ngagai kitai ngenatika pengawa ngemajuka Sarawak enggau ngelantangka rayat," ku iya.
 

Advertisement