KUCHING: Premier Sarawak Datuk Patinggi Tan Sri Abang Johari Tun Openg kemari udah bejuraika Bajet Negeri 2024 sepenyampau RM12.363 bilion.
Abang Johari ke mega Menteri Wang Sarawak madah, ari penyampau RM4.563 bilion ke tuju belanja bejalaika pengawa lalu RM7.8 bilion ungkup tuju pemansang.
“Enggau pelaba asil RM12.749 bilion sereta penyampau belanja selama sepenyampau RM12.363 bilion, Bajet Negeri 2024 dijangka ngasilka lebih sepenyampau RM386 juta.
“Tu asil ti pemadu mayuh tinggi kala ditetapka sereta bajet ti pemadu besai kala dibantaika Perintah Sarawak dalam sejarah, siti kelai pemujur nempa baru asil kami sereta ngaduka pekara wang enggau manah.
“Enggau tu, kitai ngena bajet pengerembai ti beranakka puku ti mayuh dalam infrastruktur sereta ngeletakka pengelantang rayat nyadi batang pekara,” ku iya.
Iya bejaku munyi nya maya bejuraika langgur Bajet Negeri 2024 maya Aum Kunsil Negeri (DUN) Sarawak ditu, kemari.
Ku Abang Johari baru, asil chukai bisi nyaup sepenyampau RM5.704 bilion tauka 45 peratus ari penyampau anggar asil 2024.
Asil ukai chukai dianggarka sepenyampau RM6.390 bilion tauka 50 peratus ari penyampau anggar asil 2024.
Berebak enggau nya, asil ti diterima ari ukai asil dijangka sepenyampau RM28 juta kelebih agi ari deposit enda dituntut, baya lebih ti diulih baru ari ngemunaska perengka pengangkut.
Pemeri enggau bayar pulai ari perintah besai dijangka bisi RM627 juta ngagai anggar asil 2024, nambah berindik ari pemutus Perintah Besai nambahka Geran Khas interim ungkup Sarawak.
Ungkup belanja selama ku Abang Johari, iya meri langgur penemu ambika ari RM12.363 bilion, RM4.563 bilion diungkupka belanja kena bejalaika pengawa lalu RM7.8 bilion ke tuju pemansang.
Berambaika leka jaku Pemansang Ungkup Semua: “Bersama, Membina Sarawak Sejahtera, Mampan dan Bersatu”, bajet tu dilangkar enggau silik kena nen tuka pemansang nya mungkur tetiap sukut negeri sereta ngerapitka seraka entara kandang mengeri enggau menua pesisir.
Bajet tu mega ngerintaika 12 batang pekara strategik, Ngenyampatka Pemansang Ekonomi, Meransang Pemansang Wilayah enggau Menua Pesisir, Meransang Pemeranak Puku Orang Dagang enggau PKS, Ngubah Sarawak nyadi Ekonomi Ulih Besemekih sereta Tan, Ngenegapka Modal enggau Pemansang Bakat sereta Ngenyakahka Transformesyen Digital.
Batang Pekara strategik ti dirintaika ari baruh langgur bajet tu, Meransang Pemeruan Rampa Menua, Ngenegapka Pengelantang Pendiau enggau Bungkur Pengelikun, Ngelakuka Lumba enggau Main sereta Ngenegapka Nembiak, Ngemansangka Ekonomi Bepelasarka Inovesyen Beorientasika Penemu, Ngemunas Penyeranta sereta Ngangkatka Pengelantang Pendiau Rayat lalu Ngangkatka Kapasiti Perintah enggau Meri Servis.