Sida tu raban ari ruang bilik ti bepenatai pemisi mit ti udah mujur ngerejister diri masuk institusyen pelajar tinggi (IPT)
“Laptop enda bebayar nya tu deka diberi ngagai nembiak Sarawak ti udah mujur ngerejister diri nampung pelajar ba Institusyen Pelajar Tinggi Perintah (IPTA) enggau Institusyen Pelajar Tinggi Peribit (IPTS) ungkup ruang bilik ti bepenatai pemisi pekapita RM1,500 sebulan enggau ke baruh.”
Datuk Patinggi Tan Sri Abang Johari Tun Openg
Premier Sarawak
KUCHING: Bisi 5,000 iku nembiak Sarawak ari raban bepenatai pemisi mit ti udah mujur ngerejister diri masuk institusyen pelajar tinggi (IPT) deka nerima laptop enda bebayar ari perintah Sarawak taun.
Premier Sarawak Datuk Patinggi Tan Sri Abang Johari Tun Openg madah, RM15 juta deka diungkup ke tuju nya nengah Bajet Negeri 2024.
“Laptop enda bebayar nya tu deka diberi ngagai nembiak Sarawak ti udah mujur ngerejister diri nampung pelajar ba Institusyen Pelajar Tinggi Perintah (IPTA) enggau Institusyen Pelajar Tinggi Peribit (IPTS) ungkup ruang bilik ti bepenatai pemisi pekapita RM1,500 sebulan enggau ke baruh.
“Bantu tu dijangka meri penguntung ngagai 5,000 iku nembiak ngena agih belanja sepenyampau RM15 juta dalam Bajet ke sekali tu. Inisiatif tu diberi kena ngenegapka nembiak kitai ngena teknologi ti diguna sida kena nyulut cemerlang dalam bidang akademik sida,” ku iya.
Iya madah munyi nya maya bejuraika langgur Bajet Negeri 2024 maya Aum Kunsil Negeri (DUN) Sarawak ditu, kemari.
Kelimpah ari nya ku Abang Johari, perintah Sarawak mega deka meri baucher bup RM500 ngagai 35,000 nembiak universiti enggau kolej Sarawak ti datai ari ruang bilik ti pekapita RM1,500 sebulan enggau ke baruh.
“RM17.5 juta deka dungkup ke tuju tu taun baruti deka aduka Yayasan Sarawak,” ku iya.
Ku iya, langgur penemu dua inisiatif ari baruh Program Bantu Pelajar nya mandangka komitmen perintah Sarawak ngelempungka tating belanja ruang bilik kelimpah ngenauka spektrum nembiak ti besai agi nampung pelajar ba institusyen pelajar tinggi.
“Kitai nemu utai ti diguna enggau ngurangka ungkus pengidup ba raban orang ti bepenatai pemisis mit enggau jelan iya, kelebih agi enti ungkus nya bekaul enggau pelajar anak kita,” ku iya.