SIBU: Sarakup Indu Dayak Sarawak (SIDS) Pampang Sibu deka ngatur Pengerami Ngintu Ke-35 Taun kena 28 September 2024.
Chairman SIDS Sibu Angelyn Uchi Maseng madah, pengerami tu iya nya dikena ngintu manggi 35 taun SIDS Pampang Sibu ditumbuhka.
“Pengerami tu deka diatur ba Kingwood Hotel ditu ke alai temuai dipebasa bedau deka dipadahka dulu laban bedau temu penatai.
“Ba pengerami tu ila, kitai deka ngangauka pampang SIDS ke bukai ba selampur Sarawak sereta gerempung ukai dikuasa perintah (NGO) Dayak ke bukai datai dikena ngerichahka pengerami tu,” ku iya madah ngagai pengarang berita pengudah nyadi chairman aum keterubah komiti pengatur pengerami tu ditu, kilah ensana.
Nitih ku iya, SIDS Pampang Sibu udah ditumbuhka ba taun 1989 enggau 115 iku kaban.
“Pampang kitai ti keterubah iya nya betuaika ketuai protem Rosely Umbau, ditangkanka Nancy Sudan, Sandra Suda Embas, Dato Ir Alice Jawan lalu aku berengkah ari taun 2018 nyentuk diatu,” ku iya nerang.
Ku Uchi madah, SIDS Pampang Sibu diatu bisi 1,578 iku kaban ti bisi dalam 20 ranting.
“Kaban dalam pampang kitai ukai semina orang indu di mengeri aja tang mega sida ari kandang menua pesisir ari rumah panjai ba ngelingi Sibu ti mungkur kandang menua sibu Jaya, Sengan, Salim, Naman, Teku, Pasai, Rantau Panjang enggau Penasu,” ku iya nambah.
Iya mega madahka pampang sida seruran tebuka lalu ngelaluka penyereta orang indu ari kandang menua pesisir nyadi kaban dalam bekunsika sebrang aktiviti ti ulih dikerembaika ungkup pemaik sida ngambika enda semina diau di rumah panjai aja.