Tu dikena nentuka projek pemansang ulih terus dipejalaika lalu tembu nitihka timpuh ti udah ditetapka
LAWAS: Sapit Premier Sarawak Datuk Amar Awang Tengah Ali Hasan madahka perintah sedia ngetuka servis kunteriktor ti bisi penanggul dalam nentuka projek pemansang ulih ditembuka.
Ku iya madah, pengawa ngetuka servis kunteriktor ti bisi penanggul iya nya sebagi ari chara ti mesti dipejalaika perintah dalam nentuka sebuah projek ulih diterus nitihka timpuh ti udah ditetapka.
“Nya alai kitai ngasuh ejensi ti bejalaika pengawa matau enggau semak agi projek ti dipejalaika tu. Nyema dipeda chukup mar enggau laun lalu enda pedulika pelin mulaika pemanah ti digaga kunteriktor, dia kitai madah ngambika sida tu diketuka lalu kitai ngiga kunteriktor ke bukai,” ku iya lebuh ti datai maya Aum Matau Projek Pemansang Pelilih Menua Lawas kena Hari Dua nyin tadi.
Sama bisi iya nya Kaban Parlimen Lawas Dato Henry Sum Agong.
Awang Tengah mega madahka iya nya bisi mega kunteriktor minta timpuh dilanjar laban bisi kebuah tang enda ulih nembuka projek.
Beserimbai enggau tu, ku iya koodinasyen semua opis enggau ejensi ari baruh Komiti Mutarka Penusah Ngenyit Pelilih Menua patut nyikap diri dalam betapi enggau Monsun Timur Laut (MTL) kelebih agi di kandang menua pesisir.
“Ungkup kandang mengeri tauka enda jauh ari nya nadai tentu nyadi penanggul nyema bisi dituntung penusah ngenyit.
“Kitai ngerundingka kandang menua pesisir nyema nyadi ujan bangat, ampuh bah, jalai ti putus enggau ke bukai bakani kitai deka nentuka bekal enggau aset sereta logistik ulih disediaka enggau lengkas lalu tu ti dikerandau aku,” ku iya.
Awang Tengah dekaka Parti Pesaka Bumiputera Bersatu (PBB) Pampang Bukit Sari enggau Ba'Kelalan terus nyadi entara raban ba mua dalam meri bantu lebuh bisi penusah ampuh bah.