BINTANGOR: Klinik Pengerai Bintangor deka bisi sebuah unit injin 'Bioelectrical Impendance Analysis' enda lama agi.
Kaban Kunsil Nengeri (ADUN) Meradong Datuk Ding Kuong Hiing madah, dikena nentuka tu nyadi nyata lalu bulih perengkaguna tu, perintah udah mega ngemendarka agih belanja nengah geranProjek Mit Menua Pesisir (MRP) dikena meli kereban tu.
"Sepenyampau RM20,000 geran MRP udah dikemendar ungkup meli injin tu lalu tu mega udah disuaka ngagai raban Klinik
Pengerai Bintangor.
"Perengkaguna enggau injin Bioelectrical Impendance Analysis tu iya nya dikena matau tikas pengerai peranak ari sukut komposisyen tubuh, peratus lemak enggau jisim otot.
"Injin dikena ngemuntangka raban pengereja pengawa Klinik Pengerai Bintangor ungkup analisis enggau ngerikod tikas pengerai peranak lalu ngelangkar aktiviti fizikal enggau pemakai ungkup peranak ti betapi enggau obesiti," ku Ding.
Iya madah munyi tu lebuh ti nyuaka geran MRP ngagai Klinik Pengerai BIntangor dikena meli kereban tu, bedau lama ti udah.
Peminta dikena meli kereban tu iya nya peminta ari Kelab Lumba enggau Main sereta Rekreasyen Pengerai Bintangor.
Nitih ku Ding, iya endang nyukung enggau perambu meli injin BIoelectrical Impendance Analysis dikena ngangkatka tikas kualiti pengerai peranak di pelilih menua Meradong.
Ku iya, enggau penambah pemayuh pesakit ke datai ngagai Klinik Pengerai Bintangor ninting hari, iya pechaya injin tu deka mantu raban klinik dalam ngatur pekara ti bekaul.
"Pengeransing tu mega beguna dalam nyadika chara kitai mutarka penanggul Penyakit Enda Berampit baka penyakit darah tinggi, penyakit kemi manis, obesiti enggau ke bukai.
"Berindik ari tu, kitai mega ngarapka injin tu ila ulih dikena memanah kelebih agi dalam matau tikas pengerai komuniti di kandang menua tu," ku Ding nerang.
Dulu ari tu, Ding udah nyuaka kerusi geruda enggau bantu barang ti diguna ninting hari ngagai Hashim ke diau di Kampung Melayu Darul Falah Sungai Gemuan Bintangor ti betapi enggau penanggul pengerai lalu mesti dijaga ninting maya ari raban sida sebilik.
Sama datai dalam pengerami tu iya nya Jurupulih Fisioterapi Klinik Pengerai Bintangor Tang Jun Lin, Ketuai Genturung Pendiau Rabaee Mat enggau Ketuai Raban Nembiak Parti SUPP pampang Bintangor Ley Chee Hua.