RUU tu entara ari lima RUU perintah ti deka dibantai menteri nyerumba Aum Kedua Penggal Kedua DUN Sarawak ke-19, berengkah ari 20 ngagai 29 November
Dikarang Rengenyan Labang
KUCHING: Sarawak nengeri keterubah di Malaysia mantai Rang Undang-Undang (RUU) pasal Ombudsman enggau Rampa Menua.
Speaker Kunsil Nengeri (DUN) Sarawak, Tan Sri Datuk Amar Mohamad Asfia Awang Nasar madahka, dua bengkah RUU nya entara ari lima RUU perintah ti deka dibantai menteri nyerumba Aum Kedua Penggal Kedua DUN Sarawak ke-19, berengkah ari 20 ngagai 29 November tu.
Nitih ku iya, Sarawak Ombudsman Bill, 2023 deka dibantaika Sapit Premier Sarawak, Datuk Amar Awang Tengah Ali Hasan, sereta Environment (Reduction of Greenhouse Gases Emission) Bill, 2023 dibantaika Sapit Menteri ba Opis Premier Sarawak (undang-Undang, Sempekat Malaysia 1963 enggau Kaul Perintah Nengeri – Besai), Datuk Sharifah Hasidah Sayeed Aman Ghazali.
Lalu dua RUU tu deka dibacha keterubah, kali ke-2 enggau ke-3 kena 20 November.
“Dua bengkah RUU iya nya Ombudsman enggau Rampa Menua tu iya nya ti keterubah di Malaysia, nadai nengeri bukai udah mantaika tu.
“Ngena ombudsman tu kitai deka lebih transparent ngujungka deka mayuh agi orang beranakka puku datai kitu, enti transparent orang bisi pengadal ngagai sistem nuan, sida datai beranakka puku di Sarawak sereta nengeri deka lebih tegap laban enda ngira nama sebana deka diripot terus ngagai Kunsil Nengeri (DUN).
“Lalu, bekaul enggau rampa menua tauka rumah gadung tu mega, ti keterubah di Malaysia, kebuah laban bisi pematut kitai ngemeratka pemeresi dunya, nya alai, Sarawak dulu dimua dalam pengawa ngurangka greenhouse gases emission,” ku iya seraya madah penerang silik bekaul enggau RUU nya deka dibantaika menteri.
Asfia madahka pekara nya maya baum pengarang berita pengudah tembu Baum Pre-Council nyerumba Aum DUN Sarawak ti bechairmanka Premier Sarawak, Datuk Patinggi Tan Sri Abang Johari Tun Openg, ti diatur ba Bilik Baum, Indu Opis Parti PBB Jalai Bako ditu, kemari.
Ngenang pekara nya baru, Asfia nerangka berindik ari nengeri keterubah mantaika dua bengkah undang-undang nya, Sarawak belalauka menua bukai di dunya t uke udah bisi undang bekaul enggau ombudsman enggau rampa menua nya, baka Australia enggau sekeda menua bukai.
Entara RUU bukai iya nya Supply (2024) Bill, 2023 ti deka dibantaika Premier Sarawak Datuk Patinggi Abang Johari Tun Openg ti mega Menteri Pekara Wang enggau Ekonomi iya nya bacha keterubah enggau ke-2 kena 20 November enggau bacha kali ke-3 kena 29 November.
Menteri Utiliti enggau Telekomunikesyen, Dato Sri Julaihi Narawi deka mantaika dua RUU iya nya Distribution of Gas (Amendment) Bill, 2023 enggau Electricity (Amendment) Bill, 2023, sereta bacha keterubah dua RUU tu kena 20 November, sereta bacha kali ke-2 enggau ke-3 kena 21 November.
“Berebak enggau aum tu, DUN Sarawak bisi dipadah bisi siti(1) mosyen ari menteri ari baruh Peraturan Mesyuarat 23(1)(a) sereta dibacha begulai enggau Perkara 33(1)(c) Perlembagaan Sarawak enggau Seksyen 6(2) The Sarawak Sovereign Wealth Future Board Ordinance, 2023 (Cap.81) bekaul enggau meranakka puku ti dibantaika Sapit Premier Sarawak, Datuk Amar Douglas Uggah Embas, ti mega Menteri Pekara Wang enggau Ekonomi.
“Bekaul enggau mosyen ari Ahli Dewan Biasa ari baruh Peraturan Mesyuarat 23, nyentuk hari bulan kepenudi nganjung mosyen (10 hari sebedau aum berengkah) iya nya kena 10 November 2023, DUN bisi nerima siti (1) mosyen ari Yang Berhormat Batu Lintang, See Chee How, taja pia YB tu udah ngajung siti notis matak pulai mosyen nya kena 15 November 2023,” ku iya seraya madahka mosyen ke diambi pulai nya sebaka enggau RUU rampa menua ti dibantaika menteri.
Dulu ari nya Asfia madahka sesi tanya saut deka diatur pengelama empat hari berengkah 21 ngagai 24 November.
Nitih ku iya DUN bisi nerima 322 tanya ari 41 iku Kaban Kunsil Nengeri, lalu ari penyampau nya bisi 222 tanya deka disaut tekalanya ari 39 ADUN, sereta 100 saut betulis ari 27 Yang Berhormat.
“Opis Menteri Pengerai Mensia Mayuh, Pengawa Berumah enggau Perintah Lokal nerima tanya ti pemadu mayuh iya nya bisi 54 tanya,” ku iya.
Bisi ba aum pengarang berita nya kemari, Sapit Speaker DUN Datuk Idris Buang ti mega ADUN Muara Tuang, enggau Sekretari DUN Sarawak, Pele Peter Tinggom.