Al-Sultan Abdullah meruan siru ngenang pejalai ba Borneo enggau penyayau ke dibantaika rayat Sabah, Sarawak
KUCHING: Menteri Besai Datuk Seri Anwar Ibrahim nyamin deka mansik sereta mutarka enggau naka ulih semua sebana ke udah dipadahka rayat ngagai Yang di-Pertuan Agong Al-Sultan Abdullah Ri’ayatuddin Al-Mustafa Billah Shah enggau Raja Permaisuri Agong Tunku Azizah Aminah Maimunah Iskandariah lebuh 'Kembara Kenali Borneo'.
Nitih ku Anwar, Al-Sultan Abdullah nerima empas ari peneleba sereta penyayau k diayanka rayat ngagai kededua baginda dalam program tu ti berengkah 3 nyentuk 13 September nyin tadi.
“Kena Hari Empat nyin tadi, aku udah betemu enggau Yang di-Pertuan Agong lalu iya meruan agi ngenang enggau chukup siru enggau penyayau rayat ti dibantaika ngagai seduai baginda.
“Baginda meri semua surat ke dianjung ngagai iya lalu aku nyamin deka nesau semua raban ti bekaul mansik tetiap surat lalu mutarka enggau lengkas,” ku iya.
Iya madah munyi tu lebuh ti bejaku maya pengerami Hari Malaysia Renggat Nasional 2023 di Stadium Perpaduan Sarawak ditu kena malam kilah ensana.
Sama bisi maya pengerami tu mega iya nya pemangku Tuai Pemegai Menua Negeri Sarawak Tan Sri Datuk Amar Asfia Awang Nassar, Premier Sarawak Datuk Patinggi Tan Sri Abang Johari Tun Openg sereta Kepala Menteri Sabah Datuk Seri Panglima Hajiji Noor.
Beserimbai enggau pengerami ngintu hari sejarah tu, Anwar mega ngelalau selampur rayat ngambika ngenang pengeransing ketuai ti suba enggau runding Segulai Sejalai.
Iya mega pechaya Malaysia diatu udah ba tikas ke tuai runding, kelai nya penemuai Yang di-Pertuan Agong enggau Raja Permaisuri Agong ngelawa Sabah ke Sarawak disambut manah ari semua rayat.
“Sabah enggau Sarawak udah betukar gamal, diatu Sarawak bisi potensial nyadi rantau tauka kandang menua tauka hab palan pemansang industri gadung, hidrogen sereta pekara ti nangkanka nya ti pemadu nyulut di rantau ASEAN tu.
“Sebedau aum Jemaah Menteri tadi (Hari Enam), aku minta Premier meri buah runding ngagai Jemaah Menteri perintah besai laban bisi sekeda pekara enggau aspek ti bisi dipadahka iya (energi ti ulih dikemaru, teknologi gadung, perengka pengangkut elekterik) ulih dipeda Sarawak iya nya negeri ti pemadu mansang dalam Malaysia,” ku iya.
Anwar mega amdahka, menua chukup temegah ati lebuh Kuching dipilih nyadi palan ngintu Hari Malaysia ke-60 lalu semua puji diberika ngagai Sarawak tu ukai nya kelalu tang tu mih nama ti endang nyata.
Anwar mega sama bebasaka Gbungan Parti Sarawak (GPS) enggau Gabungan Rayat Sabah (GRS) enggau sukung ti tegap ngagai Perintah Penyerakup ari baruh pegai iya.
Bekaul enggau isu Sempekat Malaysia 1963 (MA63), Anwar madah selampur Jemaah Menteri nemu runding Perintah Penyerakup lalu nyadi tanggungpengawa iya dalam ngamatka semaya ti udah ditukuka lalu tu endda agi patut diperunding.
Ku iya enggau kerejasama selampur kaban Kabinet, nyau deka semua isu MA63 ulih diputarka.