BINTANGOR: Komuniti bejalaika pengawa ti chukup berat dalam begulai enggau sebarang ejensi penerit adat undang-undang dikena ngemunsaka sebarang aktiviti sereta penyalah dalam tetiap genturung pendiau.
Kaban Kunsil Nengeri (ADUN) Meradong Datuk Ding Kuong Hiing madah, kerejasama dua piak tu endang beguna dalam nentuka sebuah genturung pendiau nya likun enggau nadai sebarang aktiviti kes penyalah lalu tu mega ulih nyamin pengelantang komuniti.
"Kitai deka mesan ngagai komuniti iya nya dalam nyaga pengelikun enggau pengelantang tu endang nyadi tanggungpengawa begulai lalu ukai semina ba raban ti bekuasa aja.
"Nyadi komuniti ti mereti enggau ngembuan tanggungpengawa, kitai patut nemu pengawa kitai iya nya enggau meri penerang ti betul ngagai ejensi penerit adat undang-undang nyema bisi sebarang pengawa tauka aktiviti ti salah ari sukut undang-undang ke bisi nyadi ba kandang endur kitai diau.
"Pengawa nyeliahka ari tumu tu endang beguna ngambika kandang menua kitai tu likun lalu nadai sebarang penanggul kes penyalah ke ulih mai ngagai mayuh empas enggau bekau negatif," ku Ding.
Iya madah munyi tu ba 'Program Townhall Discussion' Indu Opis Polis Pelilih Menua (IPD) Meradong ti diatur IPD Pelilih Menua Meradong ba Dewan Opis Pelilih Menua Merdong, kilah ensana.
Pekara ti nyadi batang dikerandau maya program tu iya nya 'Trend Jenayah Indeks di Daerah Meradong'.
Nitih ku Ding, program tu endang beguna dalam meri peluang ngagai ketuai komuniti dalam bekunsi enggau meri buah penemu ti engkeman ngambika sama ulih ngurangka tikas kes penyalah indeks di pelilih menua Meradong.
Pia mega, ku iya, program tu sama mega ulih madahka bakani gaya kes penyalah di pelilih menua Meradong.
"Sesi tu mega deka nentuka kaul ti rat enggau komuniti dalam pengawa ngurangka kes penyalah laban kerejasama kededua raban tu chukup beguna dikena mutarka kes penyalah.
"Pengawa bejalaika program tu mega iya nya dikena ngangkatka tikas penyedar sereta nyeliahka kes penyalah ba renggat komuniti kelimpah nyendiaka pelasar dikena ngatur dialog ungkup pengawa nyeliahka kes penyalah, pengelikun, pekara undang-undang enggau pelajar.
"Pia mega, program tu iya nya siti ari chara ngerapitka kaul renggat ti tinggi enggau komprehensif agi dalam mutarka isu rama ti benung nyadi," ku Ding nyemetak.
Iya mega nambah, iya endang nyukung pengawa numbuhka Skim Matau Voulunteer (SRS) ba tetiap genturung pendiau di pelilih menua Meradong dikena mantu raban ti bekuasa mutarka kes penyalah sereta mega isu rama lalu mulaika pemanah genturung pendiau nyadi lantang enggau likun.
Sama bisi iya nya Ketuai Polis Pelilih Menua (KPD) Meradong DSP Sekam Anoi, Chairman United Chinese Association Bagi Menua Sarikei Gung Chiu Kion, Sapit PPD Pelilih Menua Meradong Nasaruddin Ibrahim, Chairman Gerempung Tuai Rumah Pelilih Menua Meradong Tuai Rumah Ngipa Anding enggau ketuai komuniti ke bukai.