KUCHING: Leka jaku 'Segulai Sejalai' ti nyadi rambai jaku penyerakup di serata menua baka ti dipadahka Menteri Besai (PM), Datuk Seri Anwar Ibrahim siti basa ngagai Sarawak.
Menteri Dagang Temuai, Industri Kreatif dan Seni Pemerindang Sarawak, Dato Sri Abdul Karim Rahman Hamzah madah, taja pan rambai jaku nya dalam jaku Iban, tang nya meri reti ti besai ngagai penyerakup kelimpah meri basa ngagai jaku Iban.
Ku iya, dalam jaku Melayu, nya mai reti 'seiring sejalan' rambai jaku nya diterima ambika dikena di serata menua baka ti dipadahka PM, siti pekara ti ngemegahka Sarawak.
"Keterubah iya, kitai (Sarawak) mega tekengit ninga pekara nya ti enda dijangka, aku meda nya nyadi siti basa ngagai (Sarawak).
"Enti kitai berunding dedalam sentang reti nya, nya mai reti ti chukup dalam iya nya 'seiring sejalan' ke alai kitai (Malaysia) ulih ngemeranka penyerakup nuju pengawa ti dikereja PM iya nya nyerakupka rayat pupu bansa," ku iya.
Iya madah munyi maya aum media pengudah ngarika Premier Datuk Patinggi Tan Sri Abang Johari Tun Openg bejadi Pengerami Raya-Ngiling Bidai Gawai Dayak, ba Hotel Pullman, ditu malam ensanus.
Sama bisi ngulu pengerami nya, Chairman Suruhanjaya Perkhidmatan Awam Negeri Sarawak (SPANS), Datu Dr Sabariah Putit.
Menteri Nembiak,Lumba enggau Main enggau Pemansang Orang Dagang nya madah, tu berindik ari mayuh bengkah isu ke nyadi diatu baik nya ari raban politik tauka sida ti ekstrem lebuh meri sekeda buah penemu.
"Nya alai, pemutus ti manah (milih 'Segulai Sejalai') baka ti dipadahka PM laban iya ulih meda utai ti nyadi ba endur bukai, nadai nyadi di Sarawak.
"Tu sekalika sesiku nya bansa Dayak, Melayu, China enggau bansa bukai, ke alai rayat ulih beserakup, sama meretika pangan diri, nemu bebatak asur lalu engka nya kebuah PM deka ngena rambai jaku nya di menua tu" ku iya.
Kena 8 Jun, PM Datuk Seri Anwar Ibrahim madahka milih leka jaku 'Segulai Sejalai' nyadi rambai jaku ke penyerakup menua.
Iya mantaika pekara nya maya bejadi pengerami ngintu Gawai Dayak 2023 ba Palan Konvensyen Borneo Kuching (BCCK).