Anda di sini

Nanta: GPS dekaka perintah ti tegap

Advertisement

GPS nadai bekaul enggau ulah sekeda orang, individu tauka raban mit ti nguji deka numbangka perintah penyerakup

Alexander meri penerang bekaul enggau penetap penemu GPS dalam gempungperintah penyerakup. - Gambar Muhammad Rais Sanusi
Alexander meri penerang bekaul enggau penetap penemu GPS dalam gempungperintah penyerakup. - Gambar Muhammad Rais Sanusi

“Tang aku bejaku ngarika GPS, aku nemu kitai dekaka perintah ti tegap diteruska laban Sarawak bisi agenda kediri empu ti begunaka penegap ba renggat perintah besai”

Dato Sri Alexander Nanta Linggi
Sekretari Besai GPS

Dikarang Rengenyan Labang

KUCHING: Gabungan Parti Sarawak (GPS) dekaka perintah ti tegap awakka perintah besai ulih bejalaika pelin mulaika pemanah ekonomi kena nentuka pengidup rayat dijaga tauka diintu enggau manah.

 Dato Sri Alexander Nanta Linggi madah, berindik ari pekara nya GPS endang nadai bekaul enggau ulah sekeda orang, individu tauka raban mit ti nguji deka numbangka perintah penyerakup ti dipelaba ketegal bisi agenda kediri empu.

“Tang aku bejaku ngarika GPS, aku nemu kitai dekaka perintah ti tegap diteruska laban Sarawak bisi agenda kediri empu ti begunaka penegap ba renggat perintah besai,” ku iya lebuh ditanya bekaul enggau pekara nya.

Alexander ti mega Menteri Kereja Raya nerangka pekara nya lebuh Dirandau Khas Utusan Borneo, The Borneo Post enggau See Hua ditu, kemari.

Bejaku baru iya madahka ba renggat perintah besai, GPS bekerejasama enggau parti dalam gempung perintah penyerakup ngena objektif ngemajuka menua Malaysia.

Enggau bebendar iya nerangka GPS ba renggat perintah ukai parti komponen Harapan, tang semina bakih gempung dalam perintah penyerakup.

“Dalam perintah besai kitai gawa bekerejasama. Dalam kabinet aku duduk sepiak enggau menteri ari DAP, kami ulih begulai bekerejasama enggau objektif ngemajuka menua.

“Kitai dalam perintah penyerakup ti nyadi gempung, laban nyadi bakih gempung kitai ulih mantu nentuka penegap dalam politik ba menua kitai kelebih agi nempa penegap ba perintah besai, enggau kebuah awakka agenda Sarawak ulih dipejalaika laban kitai begunaka penegap perintah besai, sereta kitai patut mandangka kitai ‘friendly-party’ ba perintah besai.

“Nya kebuah GPS, aku ulih madah nadai penanggul gawa bekerejasama ke pemanah menua,” ku Kaban Parlimen Kapit.

Kelimpah ari nya, lebuh ditanya bekaul enggau enam pengawa bepilih nengeri (PRN) di Semenanjung Malaysia, sekalika GPS ti nyadi gempung perintah penyerakup enggau bekimpin, Alexander madahka iya ti nyadi menteri nyema bisi program bekaul enggau opis menteri iya deka datai nyadi menteri ba opis menteri.

Taja pia ku iya, GPS sekalika mantu tauka enda maya bekimpin PRN nya bepanggai ba penemu renggat tinggi.

“Nyema deka mantu, nadai salah, laban kitai bebakih enggau Harapan nyadi bakih gempung.

“Ba penemu aku kediri, nadai isu enti GPS deka mantu parti dalam perintah penyerakup sekalika Barisan Nasional tauka Pakatan Harapan laban kitai bakih gempung dalam perintah penyerakup,” ku iya.
 

Advertisement