KUCHING: Opis Menteri Kereja Raya (KKR) deka ngiga chara ulih ngaga jalai dikena nyambung menua ulu di sarawak ti enda kena bungkur projek Jalai Besai Pan Borneo.
Menteri opis nya, Dato Sri Alexander Nanta Linggi madah kelimpah ari ngaga Jalai Besai Pan Borneo ti nyadi jalai perintah besai, KKR deka mai ungkup belanja perintah lalu mantu nyendiaka jalai ngagai menua ulu di Sarawak.
Ku iya, pekara iya udah dirandau iya enggau Premier Sarawak Datuk Patinggi Tan Sri Abang Johari Tun Openg enggau Sapit Premier Sarawak, Datuk Amar Douglas Uggah Embas.
“Aku bisi dilalau Premier enggau (Sapit Premier Datuk Amar) Uggah, ambika meda nama ke ulih dipejalaika kami (KKR) awakka ungkup belanja perintah besai ulih dikena mantu nyendiaka penyambung tauka jalai ngagai menua ulu di Sarawak.
“Pansik udah berengkah dipejalaika iya nya ngiga chara bakani kitai ulih ngena konsep perintah besai mantu menua pesisir di Sarawak ba kandang endur ari baruh Ejensi Pemansang Ulu Rajang (URDA).
“Aku masuk opis menteri tu (KKR), aku meda nama ti diguna kena kitai ngagai jalai ungkup peranak di menua Ulu Sarawak ti ukai semina kena mindah ari siti endur ngagai siti endur tang ke pemadu beguna jalai tu nyadi penyungkak sosio-ekonomi ba kandang menua nya,” ku iya.
Kaban Parlimen Kapit madahka pekara nya lebuh Dirandau Khas Utusan Borneo, The Borneo Post enggau See Hua ditu, kemari.
Bejaku baru, iya madahka adap ke tengah menua Sarawak iya nya bagi menua Kapit enda kena pansa tauka bungkur projek Jalai Besai Pan Borneo, tang menua nya patut bisi akses.
Ku iya, pekara nya udah dikerandauka enggau Premier Sarawak sereta KKR dipinta mantu ngaga jalai kena nyambungka menua ulu di nengeri tu ke nadai kena pansa Jalai Besai Pan Borneo.
“Nya alai aku bejalaika inisiatif, dalam bulan Mac tu tadi aku nganjung raban ari KKR ke Kapit. Nama kebuah? Laban bisi pematut (jalai nya digaga ba menua ulu di Kapit). Pan Borneo enda mansa tengah menua Sarawak, reti nya kandang menua Kapit, bagi menua Kapit nadai Pan Borneo, tang akses ba endur tu patut bisi.
“Jalai ke endang udah bisi udah tembu ke Kapit iya nya jalai nengeri lalu enti jalai nya tembu ngujungka semua rumah panjai di seberai Sungai Batang Rajang putus penyambung laban servis bot ekspres nadai agi beoperesyen.
“Enti nadai agi bot ekspres, peranak tusah deka pansut ari endur sida sereta nadai pilih bukai iya nya ngena perau mit meraka Sungai Batang Rajang ke Pasar Kapit enggau endur bukai ngena perengka pengangkut darat,” ku iya.
Nambah nya, iya madahka seraban ari KKR dianjung bejalaika pengawa kena nyambungka Semaram laban udah bisi Pan Borneo enggau Jematan Durin nyentuk ke Nanga Tada.
Diperambu jalai nya deka dipanjaika kena nyambungka peranak entara iya ba Sg Iran, Sg Song, Sg Manap, Sg Lejau, Sg Melipis, Sg Meluan, ku iya.
“Di Song kitai merambu ngaga jematan meraka Batang Rajang sereta mega di Nanga Menua enggau siti agi jematan di Kapit,” ku iya.
Kelimpah ari nya, iya madahka di Kapit diperambu deka digaga jalai tauka baru tama ngagai Kapit dikena ngurangka penyekut perengka pengangkut ba lampu trafik Sungai Kapit.
“Diatu jalai nuju ke Pasar Kapit semina siti aja, nya alai deka bisi siti agi digaga di Kapit,” ku iya.