Anda di sini

Sikei: Perintah Sarawak seruran nyukung pengawa ngintu, nyaga enggau ngelakuka Adat Bumiputera

Advertisement
Sikie (tengah) begambar begulai bala pemesai MAIS enggau Kort Bumiputera sereta bala ketuai komuniti. Buckland (empat kiba). - Gambar UKAS 
Sikie (tengah) begambar begulai bala pemesai MAIS enggau Kort Bumiputera sereta bala ketuai komuniti. Buckland (empat kiba). - Gambar UKAS 

KUCHING: Perintah Sarawak seruran nyukung pengawa ngintu,nyaga enggau ngelakuka Adat Bumiputera nengah pengawa numbuhka Opis Kunsil Penyimpan enggau Penusun Adat Menua Sarawak (MAIS), pia ku Menteri ba Opis Premier Datuk John Sikie Tayai.

Ku iya, MAIS bejalaika pengawa ngaga pansik ba pengawa ngintu,ngelaku enggau ngemansangka adat komuniti bumiputera Sarawak.

"Baka ke ditemu kitai, Adat nya beguna amat nin ting hari ba tetiap iku kena nyaga pengelikun enggau pemaik dalam komuniti ba sekeda endur, genturung pendiau tauka rumah panjai.

"Nya alai, aku deka madahka ditu nya tanggungpengawa kitai semua, kelebih agi ba bala ketuai komuniti enggau tuai rumah, neritka adat awakka mengkang nyadi pekara ti tau nyamin penegap sosial enggau pengelikun ba genturung pendiau," ku iya.

Sikie madahka pekara maya aum khas entara MAIS enggau bala ketuai komuniti asal ba sebuah hotel kemari. 

Bisi 15 iku Temenggong, 26 iku Pemancha enggau 59 iku Penghulu ari 12 bagi menua di serata Sarawak baka Betong, Bintulu, Kapit, Kuching, Limbang, Miri, Mukah, Samarahan, Sarikei, Serian, Sibu enggau Sri Aman ngulu aum nya.

Aum nya diatur kena ngulihka penemu bekaul enggau adat enggau penanggul ti bekaul enggau komuniti asal. 

Sama bisi ngulu aum nya, Sapit Menteri ba Opis Premier (Undang – Undang enggau Adat Bumiputera) Jefferson Jamit Unyat, Sapit Sekretari Negeri Datu Buckland Bangik,Ketuai  MAIS Datu Ronnie Edward, Sekretari MAIS Mackos Sibong, Pemangku Ketuai Pengerejista Kort Bumiputera Sarawak Dahim Nadot enggau Direktor Unit Komunikesyen Perintah  Sarawak (UKAS) Samuel Simon.

Advertisement