Baka ngena hidro tauka solar kelebih agi ungkup peranak di kandang menua pesisir tauka ulu: Abang Johari
Dikarang Rengenyan Labang
KUCHING: Perintah menua Sarawak chukup keran deka nyendiaka kuasa elektrik sekalika ngena hidro tauka solar ti ngemeratka energi gadung ti meruan ngagai peranak genturung pendiau enggau rumah panjai ba kandang menau pesisir tauka ulu nengeri tu.
Premier Sarawak, Datuk Patinggi Tan Sri Abang Johari Tun Openg madahka genturung pendiau tauka rumah panjai ti jauh di menua ulu ke enda ulih disambung enggau grid besai enggau nadai akses energi, sereta dulu suba bepanggai ngagai diesel ti begunaka belanja besai.
Berindik ari pekara nya ku iya, perintah menua Sarawak nengah Sarawak Energy bisi nyendiaka alternatif energi iya nya SARES sereta nyendiaka sistem solar ngagai rumah panjai tauka genturung pendiau di menua pesisir tauka ulu.
“Tadi (kemari) kitai bisi bejadika (Solar) Testbed, kandang endur nya ngeluarka urung 450 kilowatt energi ngena solar. Reti iya nya nyadi siti proses ti udah bisi bukti.
“Ba Sarawak, ke lebih agi ba kandang menua pesisir tauka ulu, enti nadai grid hidro, kitai ulih ngena solar. Diatu mega kitai bisi program SARES iya nya energi alternatif sereta sida Sarawak Energy mega ulih ngena sistem solar kena ngeluarka hidrogen.
“Diatu amat sida ba rumah panjai nadai hidrogen tang bisi elektrik tauka energi tang enda nemu kitai pagila lusa kitai ngena energi ‘mesra alam’ lalu kitai mega ulih ngeluarka hidrogen ba kandang menua pesisir,” ku iya.
Abang Johari madahka pekara nya ba aum pengarang berita pengudah bejadi Simposium Energi Gadung enggau Eksibisyin (GESS) 2023 ti diatur ba Palan Penyulut Teknologi Sarawak (CENTEXS) Jalan Sultan Tengah Rampangi, Santubong ditu, kemari.
Berebak enggau tu iya muji CENTEX laban ti chukup inovatif ba pengawa nyendiaka energi ngagai menua pesisir.
Ku iya, asil ari pengawa ti baka tu kitai ulih meransang industri kotaj ba menua pesisir, seraya tu ulih meri penatai pemisi tambah ngagai peranak menua pesisir laban sida ulih ngasilka barang ngena energi ke bisi ngelinggi sida.
“Pemanah iya ditu kitai ngena energi gadung. Energi gadung reti iya asil produk gadung, produk gadung reti iya servis gadung lalu rega mega rega ti premium.
“Aku beterima kasih ngagai CENTEXS laban mai ubah ngagai Sarawak, aku deka madah perintah Sarawak deka nyukung kita masang (solar) ba menua pesisir,” ku iya lebuh bejaku ba pengerami bejadi GESS.
Kelimpah ari nya, nyerumba pengerami tu, Abang Johari madahka nama CENTEXS sebdau tu dikelala enggau nama CENTEXS Digital deka ditukar ngagai CENTEXS Digital and Green Energy Academy berengkah ari kemari.
Ku iya, nama nya ditukar setipak enggau pengeran perintah Sarawak deka nyapai taga ‘pelepasan karbon sifar’.
“CENTEXS mega bejalaika tanggung pengawa pemadu beguna ba pengawa nempa nembiak bepengelandik ba bidang nya,” ku iya.
Dulu ari nya ba jaku pengelalu, Chairman CENTEXS, Tan Sri Datuk Amar Mohamad Morshidi Abdul Ghani madahka perintah Sarawak komited bejalaika tanggung pengawa dalam nyadika Sarawak nyadi nengeri ti ngena sumber energi gadung ti meruan.
Iya madahka bejadika menara 5G keterubah Asia Tenggara ngena sistem microgrid surai ngagai hidrogen entara pengeran ti dipejalaika perintah nuju nya.
Ku iya, sistem 5G nya diidupka ngena sel bahan api hidrogen ti ngena sistem suria bat aba nya kena ngasilka hidrogen gadung nengah elektrolisis.
“Testbed ti digaga ba perabung enggau tanah tu ngembuan kapasiti ke dipasang sepenyampau 425 kilowatt-peak (kWp) enggau 780 panel suria ti lalu nyadika panel surai pemadu besai ba Sarawak,” ku iya negang Testbed nya.
Nambah nya iya madahka Testbed nya deka ngemuntangka semua orang ke lebih agi industri dalm meretika pemar enggau pekara ti dikena dalam pengawa nguna sistem nyimpan tenaga suria enggau bateri dalam ngeluarka hidrogen gadung.
“Tu pelasar inovesyen enggau kandang endur kereja ti amat enggau tuju mandangka teknologi, nyendiaka pansik enggau latih, ngeyampatka pengereja pengawa enggau transformisyen industri,” ku iya.
Sama bisi datai ba pengerami tu, Sapit Premier Sarawak Dato Sri Dr. Sim Kui Hian, Menteri Utiliti enggau Telekomunikesyen Datuk Julaihi Narawi, enggau bala pemesai ke bukai.