Dikarang Rengenyan Labang
KUCHING: Program latih gadung baru (new green training programme) ungkup nembiak ti udah tembu sekula benung dilangkar, awakka semua rayat negeri Sarawak ila ngembuan peluang ti sama dalam pemansang nengeri.
Menteri Pelajar, Inovesyen enggau Pemansang Bakat,Datuk Roland Sagah Wee Inn madah opis menteri iya (MEITD) nengah Palan Penyulut Teknologi Sarawak (CENTEXS) benung ngelangkar program nya.
"CENTEXS benung ngelangkar program latih gadung baru udah tembu besekula kena ngamatka aspiresyen Sarawak 2030, ke alai semua rayat Sarawak deka ngembuan peluang ti sama ba pengawa ngambi bagi dalam pemansang di serata nengeri enggau ngasaika agih pengaya nengah pelajar, kereja enggau peluang dagang.
"Sida (CENTEXS) diatu agi ba renggat ngelangkar, tang tebal agi deka bekaul enggau pekara teknologi gadung.
"Lalu aku ngasaika enti kita (nembiak) nemuai ngagai CENTEXS kita deka nemu sereta mayuh agi ulih dipelajar. Kami ngarapka mayuh agi nemuai ke CENTEXS kelebih agi bala nembiak," ku iya ti apin deka meri penerang silik bekaul enggau program baru nya.
Sagah ditanya pekara nya maya aum pengarang berita Simposium Energi Gadung enggau Eksibisyen (GEES) 2023 sereta Solar Testbed 2023 ti diatur ba sebuah hotel ditu, kemari.
Bekaul enggau program energi gadung baru nya, Chairman CENTEXS, Tan Sri Datuk Amar Mohamad Morshidi Abdul Ghani madahka pengawa ngambi nembiak ungkup program nya dipelaba diatur dalam bulan Julai.
"Bisi empat program, lalu dalam siti kelas bisi 25 iku lalu penyampau semua100 iku. Kami nagit dua kali ngambi.
"Lalu program tu bisi diatur pengelama dua minggu tauka sebulan, nitihka bansa program," ku iya nyaut pekara nya ba aum pengarang berita ti sama.
Dulu ari nya, Sagah bisi madahka CENTEXS diatu bisi nyendiaka empat program latih dalam bidang Energi Gadung enggau Pemeruan Rampa Menua.
Ku iya, program nya ungkup kategori pasca siswazah, ti beguna chalun ke udah bisi ijazah sarjana muda (degree) dikena ngerejista diri.
"Empat program latih tu ke bisi disediaka ba CENTEXS diatu nyengkaum Setipikit dalam Smart Solar PV (Pensijilan ari Huawei & Solarvest); Setipikit dalam Mobiliti & Penyimpanan Hijau (Pensijilan ari Huawei & Solarvest); Setipikit dalam Alam Sekitar, Sosial dan Tadbir Urus (ESG) Ungkup Pengawa Dagang (Pensijilan ari Intertek & Ethos)," ku iya.