SIBU: Opis Kereja Raya (JKR) enggau sida ke bekaul dalam projek ngaga Jalai Besai Pan Borneo dipinta engkah mayuh agi papan pemadah ba sepemanjai jalai kena ngurangka risiko bebadi ba jalai alun.
Kaban Kunsil Negeri Tamin Christopher Gira Sambang madah, papan pemadah nya beguna amat kena nentuka penguna jalan ralun enda saru enggau gaya jalai ti mengkang digaga nya.
"Dalam timpuh dua hari, aku dipadahka bisi lapan iku orang parai ketegal bebadi kelebih agi ba pesemanjai Jalai Besai Pan Borneo ari Sibu ke Selangau.
"Nya alai aku minta semua penguna jalai ambika semampai bejejimat berindik ari pengawa muka mayuh agi jalai ba Jalai Besai Pan Borneo.
"Bisi sekeda nya udah dibuka ngagai empat lurung lalu bisi nya semina dibuka dua lurung," ku iya lebuh dirandau kemari.
Ku Gira, penguna jalai alun mega dilalau ambika anang ngambi jalai muntang nyengkaum ngaga U-turn ba endur ke enda patut iya.
Ku Gira, U-turn semina tau digaga ba endur ti bisi ngengkahka papan pemadah U-turn .
Ulah ngaga U-turn ba endur ti enda dikemendarka nya tau ngujung penusah bebadi nyadi.
Ku iya, entara tuju ngasika papan pemadah nya endang ambika orang ke deriba bisi disiplin maya ke betengahka jalai alun.
Kena Hari Satu tu tadi, lima iku parai nyengkaum siku nembiak mit ti beumur dua taun dalam penusah bebadi ti nyadi entara dua buah kerita ba Jalai Sibu-Bintulu.
Penusah bebadi nya nyadi entara sebuah kerita enggau sebuah SUV.
Ba penusah bebadi ti pemadu baru nyadi, siku parai lalu dua iku agi bakal ti nyadi entara dua buah kerita di Jalai Stapang, Selangau, kemari.
Pengari ari Palan Operesyen Bomba, Opis Bomba enggau Penyah Penusah Malaysia (JPBM) Sarawak madah, sida nerima ripot pasal penyadi nya urung pukul 6.57 pagi ke alai udah nya nganjung enam iku raban bomba betuaika PBK II Abdul Malik Chi ngagai endur nya.
"Penusah bebadi nya nyadi entara sebuah luri tangki enggau sebuah kerita.
"Siku penumpang ba penuduk belakang kerita nya tesepit lalu disahka tim perubat ari Klinik Pengerai Selangau, parai.
"Deriba enggau siku agi penumpang kereia ke sama bakal tang mujur dikeluarka mensia mayuh ti ngujungka iya lalu ditaban ke Klinik Pengerai Selangau," ku iya.
Ku iya, deriba luri nyati nadai bakal, terus ngaga ripiot ba Balai Polis Stapang.